心臟停頓時做CPR,係唔會搓死人

心臟停頓時做CPR,係唔會搓死人
我們想讓你知道的是

當一個人喺街外心跳停頓時,個人已經係臨床上死亡了,你係唔可能搓死一個已經臨床上死亡的人。

唸給你聽
powered by Cyberon

自從消防處任何人campaign出咗之後,就好多網民批評話消防處條短片無教得好清楚全個急救程序。

首先文科生想講,清防處係教緊CPR同AED,唔係教緊你「基本生命支援」(basic life support)同「高級生命支援」(Advance life support)。喺幾分鐘短片使唔使教埋DRABCDE、primary survey同secondary survey、trauma assessment?

最基本的︰

  • 5cm 深度
  • 1秒2下
  • 雙手合上
  • AED機貼pad

全部喺條短片同首歌都講得好清楚,首歌個rhythm同羅蘭姐的表演更異常地洗腦。「深度、深度、5cm嘅深度」仲用埋身份證長度做參考;「速度、速度、一秒兩下嘅速度」配合埋首歌的速度。 所有關鍵資訊出哂,全港仲瘋傳,完美地做到public health的效果。

喺香港,我哋唔難發現仲會有些人經常會智者上身,當我哋推廣疫苗時,會話疫苗會令人自閉、推廣CPR時,話會搓死人。Please, get your facts right。

當一個人喺街外心跳停頓時,佢已經係臨床上死亡了(clinically dead),你係唔可能搓死一個已經臨床上死亡的人。就算救護員八分鐘內到達,病人已經有八分鐘腦部缺氧。美國心臟病學會的研究話畀我哋聽院前路人心外壓(CPR)和使用AED係最能拯救心跳停頓的病人的方法。無嘢好得過最基本的CPR同AED,即使無學過都可以提高生存機率。

好多時我哋都會慢慢建立咗「少做少錯」的概念,為咗怕出事而唔敢伸出援手。試想像下如果心跳停頓的是你愛人,而街上的路人無人敢伸出援手你又會有咩感覺?當有人想伸出援手時就有其他路人話「喂,你無救急牌會搓死人嫁」,而最後無搓到,你愛人失救而死,你會點諗?

今時今日,網上言論唔需要負責,但你要諗清楚當你在網上散播錯誤訊息的時候,個影響到底係乜嘢。 我唔係好明白,點解咁多持急救證書的網民會反對全民CPR,並係咁reinforce「CPR會搓死人」。係咪個急救課程無講清楚CPR係搓唔死一個心搏停止(cardiac arrest)的人,定係急救課程令佢哋有個莫名其妙的優越感,只准急救牌救人,唔准「任何仁」救人?

容許我再重申一次,some CPR is always better than no CPR。AED的設計就係畀路人同無受過訓練的人使用,你只需要跟住圖文並茂的指示去貼,部機自己會分析電流再建議電擊。無論係街邊買菜的陳師奶、中環返Big 4的OL姐姐定係報紙檔的阿偉都會識得用。從今日開始唔好再怕會搓死人,「任何仁」都應該勇敢地伸出援手。

本文獲授權轉載,原文見作者Facebook專頁

相關文章︰

責任編輯︰鄭家榆
核稿編輯︰王陽翎