社交網絡時代的「毒瘤明」效應

社交網絡時代的「毒瘤明」效應
Image Credit: Depositphotos
我們想讓你知道的是

網上世紀,其實只要隊型夠齊,一樣可以做到「毒瘤明」效應。結果呢?就係成個網絡上嘅氣氛,令你即使想講句公道說話或者表個態支持,都要諗過先。

唸給你聽
powered by Cyberon

90年代嘅香港娛樂圈曾經有個「毒瘤明」。「毒瘤明」其實係當時最受歡迎嘅青少年雜誌《YES!》唱衰劉錫明嘅花名。點解要唱衰劉錫明?因為佢係《YES!》嘅老細倪震嘅情敵。

《YES!》每期都瘋狂唱衰劉錫明,因為影響力大(喺未有互聯網同智能電話嘅時代,暢銷雜誌真係有呢個影響力),鍾意聽劉錫明被認為係柒事。劉錫明係咪真係好似《YES!》寫到咁衰,大家無從深究,總之感覺柒就唔會再買佢嘅唱片,咁劉錫明人氣插水,結果要轉進台灣。

網上世紀,其實只要隊型夠齊,一樣可以做到「毒瘤明」效應︰有KOL發動攻勢,再加上一大堆冇樣嘅account,一見有關於嗰個人或者事件嘅post就copy & paste留言撩交鬧,到有人被辣著鬧番轉頭講咗啲蠢嘢,佢地就會cap圖貼堂,再由KOL們宣傳。

結果呢?就係成個網絡上嘅氣氛,令你即使想講句公道說話或者表個態支持,都要諗過先。就算要表態,仲要諗定啲人會點樣嚟砌你,結果要表個態都要寫幾百字戴晒頭盔。最後,個議題就會「毒瘤明化」,一般人覺得好煩,咁就會die down。

咁當然啦,大家唔係第一日上網,呢啲手法都見慣見熟,由品牌到議題到選舉,都係咁樣。

我咁講唔係想賴三賴四,而係想提提各位,呢種操作已經玩咗好多年,而且愈玩愈成熟。面對呢種操作,就請更加唔好俾位人入,尤其是有身份嘅人講嘢唔該小心啲,你一次出言不遜,就會loop到你死嗰日,傷害嘅唔只係你,仲有你嘅盟友。

仲有,而家流行嘅操作係所有嘢用人性最陰暗一面去解讀,你講乜都會被故意演譯為什麼勒索什麼綁架,咁冇法子,你唯有好似做心理輔導咁小心講,冇計,你出嚟行,預咗要應付呢啲嘢。

最後,我預咗有人會鬧我將問題怪落去毒瘤明操作手法度,咁我喺度講三次:

失敗有好多因素,有自身因素有外在因素,每個因素都要檢討。
失敗有好多因素,有自身因素有外在因素,每個因素都要檢討。
失敗有好多因素,有自身因素有外在因素,每個因素都要檢討。

我講完了。

本文獲授權轉載,原文見作者Facebook專頁

相關文章︰

責任編輯︰鄭家榆
核稿編輯︰歐嘉俊