新加坡遊學團——人哋急症室係點嘅?

新加坡遊學團——人哋急症室係點嘅?
Photo Credit: AP/達志影像
我們想讓你知道的是

一個鐘評估?我諗香港只可以畀我哋最多15分鐘⋯⋯

唸給你聽
powered by Cyberon

文:小咩的醫院生活日誌

幾日嘅新加坡遊學團,主要係去上課,另外去參觀一下,人家的急症室係點嘅。

首先同我哋一樣,當啲輪床未用得著嘅時候,就泊到成個門口都係。

行到佢個急症室,面積好大。我諗係我舖頭(編按:香港公立醫院)嘅三四倍。淨係急救房有四個,觀察病房就有兩三個。除咗地方大,同事亦都多。佢哋一更返2、30個護士,係我哋嘅三倍人手。但係,佢哋求診人數就同我舖頭差唔多。可能因為咁,就可以提供更多元化嘅服務。

睇見佢哋嘅步伐,明顯無我哋連行帶跑咁,而且成個環境都好⋯⋯靜。

當地招待我哋嘅醫生對同事介紹我哋時咁講:

“they all come from hell la! Hong Kong hospital is a hell la!”

但係忙嘅時候,佢哋亦都面對同樣嘅問題,多人求診,又上唔到病房,留在急症家等床位。我嗰日就見到有2、30張病床,緊緊泊埋一齊等入院,而指示板顯示嘅等候時間係6小時。

今次去學Geriatric Emergency,即係幫吓急症室嚟睇病嘅老人家,評估佢哋需要,然後運用手頭上嘅社會資源去幫佢哋,減少入院,維持健康。佢哋評估得好仔細,吓吓成粒鐘,事無大小都照顧到。由邊個同佢返嚟睇醫生,到邊個返屋企幫佢沖涼都安排好。

係新加坡,政府要每個市民都加入一啲強制性保健儲蓄計劃。有啲係公司和僱員共同供款(有點似我哋強積金)、有啲係為老人家而設嘅,可以係入院或者做特定嘅檢查時使用。因此佢哋亦可以用呢啲錢去支付一啲公營及私營嘅家居及社區醫療支援服務。因此病人多咗選擇,不需要留院,而喺安全地留在社區生活。而喺急症室,每日有一位專責嘅護士同事去處理呢啲病人。

我諗,我舖頭要實施的話,首先嗰個專責護士應該唔會有,而係要可能分流站或者縫針嘅同事兼任。一個鐘評估?我諗香港只可以畀我哋最多15分鐘⋯⋯因爲根本無人手。

你話,咁點會做得好呢?

(本文獲作者授權轉載,文章經過編輯,原文請看作者Facebook

責任編輯:歐嘉俊
核稿編輯:鄭家榆