特首教你迴避問題

特首教你迴避問題
我們想讓你知道的是

人家問你點睇大陸,你答香港司法獨立,九唔搭八,話你一句「廢話」已經好畀面。

唸給你聽
powered by Cyberon

適逢呢排考緊DSE,林鄭特首今日又親身向考生示範,點樣答問題先可以達到無敵境界,學嘢啦細路。

話說,今早林鄭月娥在立法會被追問有關《逃犯條例》修訂,無啦啦拉去話「有議員」詆毀香港司法獨立,辜負市民云云。

未必人人會睇曬成個答問,回下帶,欣賞下林鄭特首答題大法。

大律師公會最新意見,直指移交逃犯法庭無力把關,是否移交行政長官有很大決定權。

朱凱廸就要求林鄭答「你點評價中國大陸司法制度?」引維權律師王全璋被秘密關押三年先受審,審訊不公開成例,「你係咪認為咁嘅中國大陸陽光司法係無問題,可以令你放心送人返去受審? 」

林鄭就祭出慣用的似是而非答題大法。

「原則上每個司法區域,都有自己獨特嘅制度同安排,完全唔適合由政府官員去評價。」

(即係不評論,問題是香港要和大陸移交逃犯,怎可能不確認對方的司法水平達到應有標準?難道你會同北韓協議移交逃犯等佢俾人犬決嗎?)

朱凱廸無放過佢,再追問,林鄭再遊花園,話政府「依住立法會審批嘅法律做事。」

(喂,而家係你政府提出修例,立法會問你點睇,你調轉同我講話啲嘢係我批,你無事嗎?)

朱凱廸再追問,指移交逃犯個案由特首決定︰「你點能夠迴避呢?」

結果林鄭完全九唔搭八︰「而香港引以為傲係我地獨立嘅司法制度同埋獨立法庭…」

呢個時候,毛孟靜忍唔住,大叫一聲「廢話!」

確實,人家問你點睇大陸,你答香港司法獨立,九唔搭八,話你一句「廢話」已經好畀面。

以為林鄭會覺得難堪?少年實在太年輕,林鄭氏厚顏已經超出常理,竟然借勢反擊,狠批毛孟靜詆毀香港司法制度︰「任何本會議員,詆毀香港司法制度,話香港有司法獨立係廢話,係辜負香港市民!」

What?毛孟靜係話緊你講廢話,唔係話「香港有司法獨立」係廢話…

成件事大概可以概括做,有人問林鄭佢老母姓咩,點知佢答你「香港有司法獨立」,你回佢一句「廢話」,佢就爆seed話你批評「香港有司法獨立係廢話」。

睇到未?各位同學睇到未?

無論問你咩,你都可以答一句:「香港有司法獨立!」又或者「太陽由東邊升起!」

有人challenge你,你就爆seed:「你係咪challenge香港有司法獨立?」或「你係咪challenge太陽由東邊升起?」

如果份卷0分,你一樣可以爆seed:「你係咪話香港有司法獨立係0分?你辜負香港市民!」「你係咪話太陽由東邊升起係0分?你辜負曬宇宙萬民!」

以前成日話梁振英語言偽術,其實林鄭月娥語言偽術同梁振英相比,同樣無恥、卑劣,甚至猶有過之,偷換概念比梁振英更撤底更明目張膽。

回顧近日李家超回應逃犯條例,曾多次突然爆seed發脾氣︰「唔通要我地容許殺人犯同市民一齊生活?」之類,其實和林鄭今日的做法如出一轍,就是情緒化地「畀bite」,向質疑批評的人派帽子蓋過理性討論和詢問。

偏偏傳媒因為「好聽」將這些sound bite無限loop,就正中政府下懷,有理由相信這些都是計算過後故意的操作,傳媒也好、市民也好,不得不防。

本文獲授權轉載。

相關文章︰

責任編輯︰鄭家榆
核稿編輯︰歐嘉俊