淺談抗抑鬱藥研發過程，及背後犧牲的動物

呢篇係筆者頗抗拒動筆，但最後決定寫出嚟嘅文章。作為一個關注精神健康嘅團體，我哋理應鼓勵大眾，有抑鬱症唔好諱疾忌醫。根據英國健康組織NICE建議，有嚴重抑鬱症或者抑鬱症久久不癒嘅人可以考慮抗抑鬱藥治療。絕大部分整合分析（meta－analysis）都發現抗抑鬱藥對抑鬱症頗為有效，可以話係治療抑鬱嘅有效手段。可能在坐都有人考慮過服食抗抑鬱藥，但唔知你地又有冇聽過，啲藥係點樣研發出嚟嘅呢？

就好似任何藥咁，抗抑鬱藥係臨床測試之前（Clinical Trial）都會通過一系列動物測試。聽到呢度你可能會問：咦，我哋點知隻動物係咪抑鬱先？要試藥就要定義抑鬱，而隻動物唔會同你講佢好唔開心㗎嘛。就呢個問題，心理學家有好多嘅測試方法，我就同大家分享兩個比較著名嘅──分別係「絕望深淵」（Pit of Despair）同「強迫游泳」（Forced Swimming Test）。

絕望深淵係一個籠，裝住一個倒三角形，入面有水同食物盒。研究員哈里·哈洛（Harry Harlow）將啲猴子放咗係入面最少三個月。咁點解叫「絕望深淵」？原來呢個籠嘅設計，係唔會俾啲猴子同外界有任何形式的溝通，連研究院嚟補水補食物，佢地都唔會見到。除此之外，倒三角形嘅設計會令啲猴子非常唔舒服。所以佢地就一直喺嗰度，無同伴，唔知發生咩事，又會受痛楚咁日日夜夜受折磨。開頭啲猴子都會想沿住個倒三角形逃出生天，但係佢哋爬呀爬，始終走唔到出去。呢個時候，佢哋就會非常絕望、放棄抵抗，知道自己做咩都改變唔到自己受嘅苦，就會進入習得性無助（Lerent Helplessness）嘅狀態。強迫游泳測試嘅原理都係差唔多，研究員會掉啲實驗動物入一個裝咗水嘅圓桶入面，開頭佢地會嘗試逃走，但係好快就會發現乜都做唔到，就郁都唔郁，同樣都係呢種對現實嘅無助令佢地進入習得性無助狀態。

Photo Credit: Harry Harlow, University of Wisconsin/TaoPan

咁同抑鬱藥有咩關係呢？研究員假設動物嘅習得性無助，同抑鬱症病人嘅絕望感好相似，所以佢哋會試下抗抑鬱藥可唔可以消解呢種無助感。例如係第一次強迫游泳測試完咗24個鐘頭之後，研究員會再掉啲實驗動物入個水桶度，然後會記錄食咗抗抑鬱藥嘅動物比起冇食嘅，會唔會係放棄抵抗之前堅持耐啲。如果係嘅，研究員就會下結論嗰隻抗抑鬱藥有效。

呢種實驗，無論係學術或道德上爭議性都極大。爭議嘅核心，就係究竟動物嘅呢種行為表示出嚟嘅「絕望」係咪同人類嘅絕望同一性質。如果唔係嘅話，呢類實驗自然就冇學理基礎，因為佢量度緊嘅嘢同人類嘅抑鬱狀態冇乜關係。如果係嘅話，咁就有道德爭議。有啲支持動物實驗嘅學派，認為動物只不過係對環境刺激作出反應嘅機器，例如法國著名哲學家笛卡兒（Rene Descartes）就抱持呢個觀點。或者佢哋認為動物雖然有感覺，但係佢哋嘅痛苦比較低層次，例如化妝品測試，啲研究員會塗化妝品落兔仔隻眼上面。雖然佢哋啲眼俾人監生攋爛會痛，但係呢啲肉體上嘅痛楚係比唔上人類絕望、憤怒、傷感呢啲精神痛苦咁高層次，所以動物測試可以接受。但係抗抑鬱藥嘅測試嘅性質好唔同，因為佢學理上假設咗動物所受嘅苦係同人無本質上面嘅分別。如果係咁，我哋係咪應該繼續呢啲研究呢？動物嘅能力唔及我哋，但如果單純因為咁，我哋不停轉嫁自己嘅痛苦去弱者度，又係唔係一件合理嘅事呢？

呢啲問題去咗倫理學範疇度，亦唔係三言兩語可以講清。筆者寫呢篇文章，只係想點出抗抑鬱藥背後較鮮為人知嘅真相，最後服唔服抗抑鬱藥係個人選擇。但係最低限度，筆者想帶出一個訊息：就係當今人類嘅福祉，係建基於無數動物嘅苦難之上。就算我哋即時改變唔到生活模式，至少都應該常存感恩、盡量減少佢哋嘅犠性。

本文獲澍洞 - TreeholeHK授權轉載，內容稍作修改，原文請看此。

相關文章：

• 從個人幸福快樂到商業心理學：2019年心理學入門推介書單
• 是牠也是你和我──讀《寫在牠們滅絕之前──香港動物文化誌》
• 豬到底有幾聰明？（影片）

責任編輯：黎家樂
核稿編輯：歐嘉俊