抗爭時應該用乜嘢通訊Apps?

抗爭時應該用乜嘢通訊Apps?
Photo Credit: AP/達志影像
我們想讓你知道的是

過住香港人比較習慣用Whatsapp同Telegram做通訊,筆者就嘗試分析每種唔同人應該要點使用呢啲通訊裝備。

經過6.12抗爭,筆者見好多人突然裝好多唔同的通訊Apps,其實講到幾安全都好,無做setting或者亂用都一樣危險,何況每個人的崗位唔同,需要的資訊都唔同。過住香港人比較習慣用WhatsApp同Telegram做通訊,筆者就嘗試分析每種唔同人應該要點使用呢啲通訊裝備。

筆者認為喺抗爭入面,最擔心唔係警察知你行動。而係被捕後的電話資料拎嚟告你,所以每個人要注意的事都有所不同。

乜嘢人都好,唔好臨時臨急裝Apps

雖然坊間好多比較,話WhatsApp有group chat encryption,又話Telegram有secret chat,不過每種通訊Apps都要閣下熟練先可以發揮保安功用,所以臨時臨急裝Apps不但無用,反而更有機會洩漏資料。

低被捕風險抗爭者

即係指其實只係想到現場聲援下,無乜實際行動會傾會做,最多只係搬下物資,會睇下公海Group新聞之類。

小心選擇公海Group

盡量避入不明來歷的WhatsApp group,因為WhatsApp group會透露你的個人電話號碼,如果group入面太多陌生人,其實對你的個人資料有嚴重威脅。

如果喺Telegram group,大家要首先留意自己的Telegram有無set好privacy,喺Privacy and Security入面,Phone No必需set做My Contact 或者Nobody。以保障自己的個人資料。

q1_jCPd6Etsc2VENIn-mESR3Q
記著set好privacy

討論區留言亦要小心

其實你識去留言警察又點會唔識,所以喺討論區留言或者討論行動其實非常危險。筆者到過法院聽審朱經緯案,過程中警方會用大量鄭仲恆的網上留言作為証供,所以只要你有一日參與抗爭被捕,過住的留言就會變成控方的証據。

如果你是抗爭者

如果你有組織行動或者是團體骨幹成員,親身走到前線,被捕機會較高。

行動前要甩Face ID同埋Finger pin

Face ID同Finger pin實在太容易俾警察開你部電話,所以行動前應轉返用key-in password,咁就算被捕,警方都難以開啟閣下的電話取證。

使用Telegram secret chat

雖然Telegram的保安實際上無WhatsApp咁好,不過secret chat功能,喺單對單的chat room開secret chat,仲要set埋時限自動刪除message,咁就算有人被捕,警方都無法得知你倆的對話內容。

發佈資訊的最好用Telegram Channel代替Group chat

WhatsApp的group chat有encryption,唔需要太擔心截取訊息。不過請注意,太敏感的話題真係唔適合group chat講,而且應該定時自行清message,因為假若有group友被捕,Group chat的內容有機會透過被捕者的手機公開。抗爭完結亦請記著delete group,唔好留戀不必要的留言。

其實用Telegram的Private channel,只邀請可信的人睇,咁會比較安全。甚至剔走sign message以隱藏發言者名字,可當Group chat用使用,更有效保障通訊者安全。

1_-GNf114BdtXia1dIiW1gbg
Telegram的Private channel setting
我想做公海版主?!

其實公海版主要負責版內所有人所有留言的資訊安全,所以都係留返俾有經驗的網絡保安員做比較好,以免誤己害人。

相關文章:

本文獲作者授權轉載,原文請看作者Medium

責任編輯:歐嘉俊
核稿編輯:鄭家榆