上唔到連登、立場,係咪DDoS?

上唔到連登、立場,係咪DDoS?
Photo credit: Shutterstock
我們想讓你知道的是

DDoS同龍翔道因為多車所以塞車差唔多,日日都會有,只係程度上的分別。

唸給你聽
powered by Cyberon
1_wW0Ti8jvtNUzxGJLAiY5Aw@2x_(1)

喺七一遊行完晒,學生衝入立法會再出返嚟,警察放晒催淚彈清場,林鄭4:00記者會,香港瞓醒返工放工後。大陸網軍終於決定DDoS香港啦……er……好遲,感覺好遲!

7月2日上唔到連登、立場,係咪DDoS?

其實唔只連登立場,好多網好似Baby Kingdom同香討都上唔到,其實基本上可以排除DDoS。即係如果駭客要攻擊網站或阻止通訊,必定要集中火力攻打目標,才有阻止網站運作的效果。

最近一個出名的DDoS例子就係佔中運動的「PopVote」投票網站在2014年6月14日晚9點至11點及6月15日8點至11點半先後遭受駭客發動DDoS攻擊,一度無法連線。投票網站使用三家公司提供的雲端運算服務。其中亞馬遜網路服務系統在20小時內收到超過100億次的域名解析查詢,CloudFlare與UDomain的網路流量分別達到每秒75Gb與10Gb。大部分攻擊來自香港本地ISP。在攻擊事件後,只有CloudFlare願意繼續提供投票服務。

今次出事同樣係CloudFlare
1_68njcM-RP9f6Hwjnp1iXcg@2x
CloudFlare解釋事件

CloudFlare的CEO亦都好快就澄清唔係DDoS,事實上一個軟體升級出事,做成CloudFlare運作唔到,IT人亦都在30分鐘內還原系統。

7月3日Facebook、Instagram、WhatsApp都load唔到圖

其實只要冷靜啲諗一諗,睇唔到圖同片,又唔係login唔到,點計都唔關DDoS事。Facebook、Instagram、WhatsApp而家係同一間公司,明顯係編程要死一齊死,軟件工程師要負責。只要諗下,都可以肯定唔關DDoS事,何況Facebook咁大間公司,點會靠CloudFlare做網絡保安?要做肯定都自己做埋啦!

Digital Attack Map又點解釋?
1_TJZGzgtQKcQ-iFq4G4muIQ
Digital Attack Map不可信

首先筆者會質疑attack map數據點嚟,要畫一張咁嘅map,即係全世界所有server都將自己的數據send多份畀畫圖的人,咁先可以知道transaction的來龍去脈。問題係就算真係有呢啲數據send畀你,有無能力「接住」都成問題,全世界transaction的資料喎,你部機可以唔爆?

KOL一個永遠唔會錯的答案:DDoS

DDoS的中文叫「分散式阻斷服務攻擊」,簡單嚟講就一大堆殭屍電腦去連結攻擊目標,受攻擊的電腦因要處理大量數據而變慢甚至當機。

而互聯網中的數據本身就很多,有時某些網站突然爆紅,CloudFlare這類保安公司若未能及時調配資源來處理數據,DDoS的效果亦會出現,所以互聯網上的DDoS亦普遍得很。

所以DDoS同龍翔道因為多車所以塞車差唔多,日日都會有,只係程度上的分別。但大家無理由今日塞耐咗就話係恐襲,仲有好多好多原因可以令龍翔道塞車,可以係修路,亦都可以有警察放路障。

網絡問題亦一樣,次次話DDoS肯定唔會錯,但主因不一定係DDoS。如果報導隨便搵唔識科技嘅IT界KOL就指係DDoS,其實好唔負責任。同報假新聞又有乜分別?

本文獲作者授權轉載,原文請看作者Medium

責任編輯:歐嘉俊
核稿編輯:鄭家榆