青年人目標唔係買到樓,而係「免於奴役嘅自由」

青年人目標唔係買到樓,而係「免於奴役嘅自由」
Photo Credit: Kin Cheung/AP IMAGES/達志影像
我們想讓你知道的是

唔駛擔心林鄭轉講房屋政策係可以成功轉移到視線,因為佢都係繼續推緊青年人入火坑,助燃社會不憤。

唸給你聽
powered by Cyberon

文:陳劍青

其實好多人重未搞清楚,青年人講咗咁耐房屋問題,目標唔係話一定要買到樓,最後想要嘅其實係一種「免於奴役嘅自由」,本質上同反修例訴求有種共通性。

即係唔想未來再畀個業主一個月通知逼走、又或者無端端加成倍租、供樓供到人生都冇埋、討厭畀地產霸權操控著啲樓價同供應,為咗供佢起個間納米樓或者交貴租同佢打一世工,奴役至死好唔甘心。等同於今天你唔想生活嘅香港變咗部提款機、被規劃、被洗腦、冇得揀,成為極權政府嘅奴隸一樣, 一種自主自由的追求。

但林鄭一直以來最狠毒之處,就係將所有個訴求扭曲成為「幫你買樓」,以偽善嘅政策修辭,用盡任何方法畀少少甜點你推你去供20至30年樓,講到明「公屋封頂論」封殺埋其他公營房屋後路,全面私有化,谷晒市民啲需求入去幫港鐵、市建局、地產商、大灣區同政府部門買樓,等你慢慢接受供樓就係要付上一世代價,妳話冇同地產商夾埋都唔信。

當然背後重有種「全民藍絲」嘅社會改造想像,成日以為用間樓綁著你一整代,咁瘋狂DQ、晚晚警暴、侵害權利、官商鄉黑,就會因為被供樓奴役至死,乖乖不再反抗。就算依家已經去到想要用房屋政策轉移視線嘅地步,佢呢套用樓綁人嘅諗法都係冇變。

根據林鄭最新嘅房屋救火措施,都係諗緊點樣轉晒啲公屋用十幾廿年供趕絕廉租,死都唔放寬公屋政策畀所有買唔起私樓嘅一般香港市民申請,撥多啲地起多啲私樓單位交數,繼續用「土地共享」養肥啲土地利益,等你易啲申請到按揭供樓等等,都同樣已經set定個trap等你上釣,尤其唔想買樓嘅年青人,基本上都係死路一條。

唔怪得年青人係會想同妳攬炒,已經唔係no唔no stake嘅問題,係妳根本做唔到點樣令我住嘅情況可以「免於奴役嘅自由」,once and for all唔駛再同妳泥漿。

有眼見香港住嘅死症一定唔係土地唔夠,可以係林鄭意識形態問題,更關鍵都係個體制問題。喺依家個政治結構同城規制度裡面,唔好妄想Carrie係會carry到真係大大降低住屋成本嘅土地房屋政策,令每一代香港人唔再因住嘅問題而被奴役,亦都冇人會信妳可以做到。

換人換制度,係最基本解決房屋問題嘅條件,有人話信中央出幾招就可以解決呢個深層次問題,其實中資佢地都要落黎炒埋一份,咁講都係等炒車。

所以唔駛擔心林鄭轉講房屋政策係可以成功轉移到視線,因為佢都係繼續推緊青年人入火坑,助燃社會不忿,冇畀佢啲政策修辭呃到嘅話就會明。

本文獲作者授權轉載,題目由編輯所擬,原文見作者Facebook

相關文章:

責任編輯:黎家樂
核稿編輯:鄭家榆