阿sir買炮,唔使你教

阿sir買炮,唔使你教
Photo Credit: Felipe Dana / AP Photo / 達志影像
我們想讓你知道的是

2014至15年度,警察「重型武器及裝備」總開支只有約$1.49億,但直至2019至20年度已大幅上升1.4倍至預算$3.61億,所為何事?

唸給你聽
powered by Cyberon
武器開支有幾多?

近來示威者買gear越來越困難, 但警察嘅gear就不斷升級,TG放題、水炮車、裝甲車逐步亮相,令人擔心警察手上面仲有無更多大殺傷力武器。過去幾個月公眾質疑警察花咗幾多錢買武器,同埋仲有幾多存庫,但呢啲資料,當然同警察嘅透明度一樣啦,完全當納稅嘅市民係透明,唔肯透露進一步嘅資料。

但好彩我哋可以從香港警務處嘅財政預算案中睇到少少趨勢。2014至15年度,警察嘅「重型武器及裝備」嘅總開支只有約$1.49億,但直至2019至20年度已大幅上升1.4倍至$3.61億(預算)[註1]。咁實際上買咗乜?仲有無新購入更多水炮車?Sorry,公開資料極少,正所謂「阿Sir買炮,唔使你教」。

做盤靚數 疑隱瞞重型武器開支

2015年初,傳媒發現警務處喺財政預算案加入購買3部水炮車嘅預算,每部$900萬,合共$2700萬,引起公眾恐慌。當時雨傘運動落幕不久,政府唔會估唔到買水炮車會引起激烈輿論。但根據財政預算案規定,若部門採購每項超過$200萬嘅「機器、車輛及設備」,就須要喺預算案中獨立成項審議,所以無辦法唔公佈。

未知是否同水炮車爭議有關,政府喺2016至17年嘅財政預算案中,鬼祟咁將須「獨立成項審議」嘅限額由$200萬以上,大幅提高至$1000萬以上[註2]。呢個改動,政府完全無解釋背後原因,亦不合乎常理(通常更改限額都是因為物價通脹等,增加5倍並不尋常),而且剛剛係每部價值$900萬嘅水炮車之上。

72466184_2578879945541396_27854423662725
圖片由作者提供

換句話說,2016年後,若警察買更多水炮車、裝甲車、聲波炮或其他意想不到嘅「大殺傷力武器」,只要「較到個spec」令採購金額喺$1000萬以下,咁就可以放入「小型機器、車輛及設備(整筆撥款)」或「警隊特別用途車輛( 整體撥款)」帳戶中。話明係「整筆撥款」,即係歸類為「雜項」,無需要交代詳情。

自2016至17年「做盤靚數」起,同重型裝備及武器相關嘅「整筆撥款」嘅數字(即「小型機器、車輛及設備(整體撥款)」、「警隊特別用途車輛 (整體撥款 )」),已經大幅由$1.81億,膨脹至2019至20年預算嘅$3.17億。2016年嘅「造數」,令政府毋須交代今年$3.17億「雜項開支」現金流嘅細項;相反,須獨立成項嘅「機器、車輛及設備」現金流只有$4300萬。雜項總數係主要項目嘅7倍幾,你話唔係造數隱瞞都無人信。警察究竟買咗乜武器?不敢想像。

又唔做野,又唔讀書?

就「整筆撥款」嘅造數遊戲,曾經有議員提出質疑。張超雄議員在2018年曾經詢問警察「整筆撥款」嘅明細,只獲敷衍回應「撥款用於購置及更換行動裝備及支援前線的設施和執法、搜證及訓練裝備及設施」[註3],無具體交待,任何武器也可以屬於「行動裝備」,簡單啲講就係答咗等於冇答,又唔做嘢,又唔讀書。

警察唔答武器開支,絕對唔係個別事件。近年政府在公帑運用上逃避立法會監察,已成一個趨勢,尤其以警隊為甚。本土研究社翻查咗今年合共500條[註4]立法會議員審議財政預算案時提出,與各紀律部隊(包括警隊、消防、懲教、入境等)開支有關嘅問題,初步發現警隊係「最多秘密」嘅紀律部隊。

每逢警隊被問及有關採購武器、新設備、資料情報系統嘅詳情,警察均會以多種理由拒絕提供,最常用嘅理由為「涉及警隊行動部署細節」或「沒有具體數字」;例如張超雄議員問及「胡椒噴劑、催淚胡椒煙霧器、伸縮警棍、左輪手槍、寸半口徑大口槍、雷明登散彈槍」嘅預算開支、存量、實際開支(問題編號SB248及SB249);莫乃光議員問及警隊新購入的「資訊及情報系統」嘅種類和開支、是否來自中國供應商(問題編號SB147);鍾國斌議員問及嘅「反恐裝備」、「反恐培訓內容及開支」(問題編號SB012),建制泛民,一視同仁,均無可奉告。

議員詢問公帑運用嘅問題,只係牽涉一般性資料,如警察採購咗咩武器、咩裝備,既無關行動部署細節,亦唔係「國家機密」。事實上每個紀律部隊均有行動部署細節,同屬紀律部隊嘅海關,卻會按議員要求,公佈採購儀器的詳情,如掃描機、車底檢查系統、毒品辨識器等(問題編號SB478),香港警察係咪有特權?係咪大_晒?。

反修例運動進入第五個月,警暴已成日常,警察使用的武器規格越來越高,差不多每天都有市民被警務行動傷害,整個社會已陷入恐慌。若然政府還有挽回市民信心嘅意圖,除了成立獨立調查委員會外,更應該公佈過去五年、雨傘運動後所購入的武器明細,充分交代其採購理據及公開武器的使用守則。

註:
  1. 重型武器及裝備指「機器、車輛及設備」、「警隊特別用途車輛」等。2014至15年至2019至20年財政預算案:總目122 香港警務處,詳細資料請見
  2. 概括而言,政府採購預算以「大金額項目獨立成項、小金額項目放入雜項」為原則,雜項自然不會獨立成項顯示,以「整筆撥款」一次過向立會交代。2016年,政府更改「大金額項目」與「小金額項目」定義,界限由$200萬大幅提升至$1000萬。故此若有新水炮車購入(價值大約$900萬),該項目將會被放入「小型機器 、車輛及設備(整體撥款)」或「警隊特別用途車輛 ( 整體撥款)」中,再不會獨立成項,公眾無從監察。見2016財政預算案簡介
  3. 審核2018-19年度開支預算 管制人員的答覆 保安局 答覆編號SB314
  4. 審核2019-20年度開支預算 管制人員的答覆 保安局 答覆編號SB012、SB147、SB248、SB249
  5. Section 23, Freedom of Information Act 2000 of United Kingdom

本文獲本土研究社授權轉載,原文見

相關文章:

責任編輯:黎家樂
核稿編輯:歐嘉俊