學中國搞「智慧監獄」,香港城市監獄化開端

學中國搞「智慧監獄」,香港城市監獄化開端
Photo Credit: Reuters / 達志影像
我們想讓你知道的是

大數據隨時可配合其他智慧城市監控基建(如智慧燈柱、智慧警務、智能身份證)作日常數碼監控,大家要合力睇緊啲未來嘅撥款同進展!

唸給你聽
powered by Cyberon

早排政府計劃拎19億「新疆嶺」平整反恐基地、機場又拎18.6億起機場警區行動基地,「反恐」無底線,今次我哋又發現原來政府已經同步靜靜雞「新疆化」緊香港整個監獄基建系統。

今年年頭,當社會集中關注緊國歌法同修訂《逃犯條例》個時,懲教署自己在2月開咗個記招[註1],展示落實「智慧監獄」初步成果,公佈咗原來已經開展咗兩個「智慧監獄」試點,將一種名為「智慧手帶」、「影像分析及監察系統」等監控科技植入監獄系統。當時引進高科技嘅理由係以有助「提昇管理效率」、「防走犯」同「防止自殺」包裝,減低公眾嘅敏感度,就令「智慧監獄」過咗關冇人再理。

「智慧手帶」係乜?配備咗可追蹤在囚人士實時位置嘅功能,一旦戴上就唔可以自行除下,只要稍為偏離原訂路線,或者心跳節奏唔同咗,系統都會即時通知懲教人員[註2],係名副其實現代版「金剛圈」。講得好聽就用嚟防自殺,但更重要係可以收集到在囚人士嘅行為、地理移動及心理狀況等私隱數據,政府理論上就可以掌握到唔同類型嘅人嘅習性同驚啲乜。

「影像分析及監察系統」又係乜?唔單只係防止逃獄及打鬥[註3],而係可以透過人臉辨識技術,實時分析你眉頭眼額動作表情,再併埋「智慧手帶」嘅數據,綜合起嚟理論上就更精準預測到咩樣代表咩情緒反應,監控範圍依家連廁所同沖涼房都唔放過(政府聲稱會在視頻上遮蔽私處)。

查翻香港應用科技研究院(應科院)網頁,可以發現有間叫「天地陽光通信科技」嘅北京創科公司,過去曾協助懲教署研發咗個「智慧視頻監控平台」,用嚟實時處理獄中海量監控視頻[註4]。即係話,過去監獄裡面嘅影像已經有可能一直經呢個平台畀咗大陸。究竟未來嘅監獄大數據,會唔會送中配合大灣區智慧新警務合作?暫時亦係個好大問號。

智慧監獄係為咗防走犯所以有需要?懲教署自己都承認過去11年都冇試過有逃犯[註5],根本唔能夠成為合理化攪「智慧監獄」嘅理由!亦有議員指出過,要保障安全根本唔需要過度科技嘅監控。[註6]

76717411_2704892829606773_69879405625779
圖片由作者提供

現時香港成個智慧監獄基建可以做到嘅監控功能,基本上同中國(尤其新疆)近年同步攪緊嘅「智慧監獄」已經好類近。新疆監獄直情不只運用嘅監控科技例如人臉識別技術,而且仲有「人臉情感人工智能」等,可以實時監察在囚人士活動[註7]。雖然所謂「情緒辨識」(emotion recognition)技術效果一直成疑,但中國官員已經在2019年11月承認在新疆正式應用[註8],發展緊「讀心術」嘅人工智能人類社會偉大實驗。

所以新疆再教育營/監獄最可怕之處,唔係單純強制你學普通話唱紅歌,最恐怖係捉你入去毫無私隱收集緊你生活上所有行為及生物數據(biometric data),再從行為大數據推演出咩人有咩行為諗緊乜、將平民當「潛在恐怖分子」分等分類實時監控、咩人會有潛在反抗意識等,最後做到「預防性反恐」。所以中國模式嘅數碼監控監獄扮演著一個關鍵角色,從監獄開始監控,最終複製到成個城市都變成一個大監獄,人人自危。

事實上,今年4月另一份中國官方內部文件《關於加強和改進監獄工作的意見》亦首次透露,習近平新時代的監獄「始終把維護國家安全和維護社會穩定作為監獄工作的首要任務」,亦提到「運用大數據、物聯網、人工智能等現代科技手段,加快建成標準規範科學統一、數據信息全面準確、業務應用靈活普及、研判預警智慧高效的『智慧監獄』」[註9]。呢幾年中國大城市攪智慧監獄如雨後春筍,香港同國家戰略夾得咁天衣無縫,一定唔係被規劃啦。

同呢幾年中國大城市都攪智慧監獄一樣,其實特區政府於2016年開始提出[註10],2018年4月懲教署成立反恐專責組,到年底保安局考察新疆反恐設施時懲教署亦有代表隨團。在解釋為何懲教署反恐都要反到去新疆,政府回應「若要有效地支援紀律部隊在反恐及不同方面的多元執法,有關部門必須參考其他地方的經驗和最新發展……懲教署亦參照外地經驗,加強在獄中的反恐活動工作等」[註11]。考察完成,今年2月就公開展示「智慧監獄」初步成果,配合著成套國家戰略嚟改造香港嘅有監獄功能,亦都係呼之欲出。

按保安局立法會文件,未來政府如無意外會於香港所有監獄同收押所全面實行智慧監獄,今年即將會開展新一輪「資訊系統策略研究」,分短、中、長期配置更多創新及科技項目[註12]。依家好多人關注嘅新屋嶺同荔枝角收押所,一係就冇CCTV一係就超多死角位,裡面發生好多性侵打死人指控。但當日後「智慧監獄」全面落實,未來冇cam又死有哂cam重驚。到時候,喺大陸做開智慧監獄生意嘅中資國企(當然唔少得唔介意配合數碼極權嘅創科企業),就真係賺到笑。

大家真係唔好以為智慧監獄只係會影響在囚人士權益,依家已經有超過6000個香港人因反修例運動被捕過,未來都會面對著呢種風險。而且當智慧監獄變成日常,周街濫捕手足就唔只係為咗恐嚇,而係可以實現好似新疆再教育營做收集「異見人士」行為及生物數據,更加令政府有誘因濫捕更多示威者,捉得愈多愈好,最後這些大數據亦都隨時可配合其他智慧城市監控基建(如智慧燈柱、智慧警務、智能身份證)作日常數碼監控,到時就正式進入蒙面都防唔到監控嘅瘋癲時代,大家真係要合力睇緊啲未來嘅撥款同進展!

註:

參考資料:

  1. 囚犯日後或須戴電子手帶 智慧監獄設三大系統作高科技監管(立場新聞)
  2. 立法會CB(2)529/18-19(05)號文件
  3. 立法會CB(2)1100/18-19(05)號文件P.5
  4. 智慧監控視頻分析技術平台(香港應用科技研究院
  5. 懲教署發展智慧監獄系統(政府新聞網)
  6. 立法會議員邵家臻 與「青少年囚犯人權關注組」:對懲教署大幅裝置「影像分析及監察系統」閉路電視(CCTV)的聯合聲明(香港獨立媒體)
  7. 新疆烏蘇監獄被司法部命名為“智慧監獄示範單位”(新疆維吾爾自治區監獄管理局網)
  8. Emotion recognition is China’s new surveillance craze(Financial Times)
  9. 祕密文件曝光 中國迎來習近平的「智慧監獄」(寒冬)
  10. 立法會CB(2)949/15-16(07)號文件
  11. 立法會討論文件:2018年4月懲教署成立反恐專責組
  12. 立法會討論文件:懲教署「智慧監獄」的發展

本文獲本土研究社授權轉載,題目與內文由編輯稍作修改,原文見

相關文章:

責任編輯:Alex
核稿編輯:Alvin