不封關之迷:林鄭死都唔封關,因為未來要開更多關

不封關之迷:林鄭死都唔封關,因為未來要開更多關
Photo Credit: AP IMAGES / 達志影像
我們想讓你知道的是

林鄭拒絕全面封關,可能是因為大灣區未來「中門大開」規劃方針背道而馳。

唸給你聽
powered by Cyberon

好多人唔明點解連幾千醫護罷工,林鄭死都唔肯全面封關。其實除咗係性格問題,好可能係因為同佢配合嘅大灣區未來「中門大開」嘅規劃方針背道而馳,過唔到自己「心理關口」。

除咗現時14個入境管制站,好多人冇咩留意未來為咗配合粵港澳大灣區戰略,重會打通更多其他新關口,有啲本身重係靜靜雞被規劃,隨時成為未來防疫新隱患。

大灣區「隱藏關口」大檢閱
Screenshot_2020-02-10_at_3_35_49_PM
圖片由作者提供

一、蓮塘口岸免簽證入境:配合東進東出的深港規劃,本身預咗上年開通,因運動同疫情依家暫緩至今年底,但原初規劃文件假設未來畀內地居民免簽證入境。[1]即係佢未來都諗著有關等於冇關,依家重點會全面封關?

二、河套區神秘專才通道:為配合大灣區創科產業融合,河套規劃中暗中劃咗有條大橋橫跨深圳河,會成為一個全新過境通道。早幾年官方規劃研究有提及會「有待進一步研究」[2],近年就有新聞放風研究緊畀啲「河套證」深港專才直接過境[3],甚至研究緊點畀深圳落黎有條「綠色通道」,用人臉辨識技術做到「無感通關」[4]

三、北環線直接送中:本身規劃中嘅北環線原意係駁通新界西北到東北,但近月深圳政府已經預留埋個位畀北環線接埋上皇崗超級口岸[5],而前規劃署署長上年12月就開始放風話建議北環線變成送中鐵路[6],即係暗中違反鐵路策略,又想整多一個類似羅湖嘅新入境通路。

四、粵港澳遊艇自駕遊:好少人知道除咗空陸兩路入境,2017年已經開始實施「粵港澳遊艇自由行」,水路都可以直接落黎自駕遊。依家大灣區規劃重研究緊再簡化出入境手續,重配合緊起更多本地遊艇泊位畀陸艇上岸[7],例如東大嶼欣澳填海區,遲啲成條海岸線隨時都有入境隱患。

五、東大嶼高鐵支線站:早前研究社揭發深圳已規劃東大嶼人工島有條高鐵支線[8],好可能市區又割多塊地做一地兩檢內地口岸區,到時有類似疫情叫停高鐵站將會更難自主決策!

所以,未來唔單止關口愈來愈多,關口本身都出現重大變化,邊界會變得愈來愈不確定、滲透性高、更難自主決策,最後更難防疫守護。

內地居民免簽證、專才自出自入、更多一地兩檢、海域邊界模糊化,未來中港邊境藍圖就係想中門大開,「全面封關」當然成為了執政者的心魔。

資料來源:

  1. 蓮塘口岸文件驚爆 誓推深圳居民免簽 中港同城 梁振英未死心(蘋果日報)
  2. 被篡改的河套規劃(本土研究社)
  3. 深港合作發展落馬洲河套區 林鄭:土地確認屬香港 將為深圳人員提供出入境便利(立場新聞)
  4. 深圳規劃河套深方區域「1+8」政策(大公報)
  5. 港鐵北環綫「被規劃」越深圳河直達新皇崗 或淪「被送中」新陷阱(蘋果日報)
  6. 凌嘉勤倡北環線伸延 至河套區設新口岸(頭條日報)
  7. 深圳推海事24舉措 增遊艇自由行試點(文匯報)
  8. 港人蒙在鼓裡,國家機密洩露:東大嶼人工島有條隱藏高鐵?(關鍵評論網)

本文獲本土研究社授權轉載,題目與內容由編輯稍作修改,原文請看

相關文章:

責任編輯:Alex
核稿編輯:Alvin