香港首批啡色路牌登場:不完美,可接受,但都有驚喜

香港首批啡色路牌登場:不完美,可接受,但都有驚喜
Photo Credit: 道路硏究社
我們想讓你知道的是

海洋公園對出迴旋處出現全港第一塊啡色路牌。嗱,講明先,啡色路牌並非羅湖橋以北嘅專利。咁究竟啡色路牌係何方神聖呢?

文、攝:Gary Yau|繪圖:Gary Yau、Thomas Ng|編輯:Pak Hin Law、Thomas Ng

早前,友社滄海遺珠發現海洋公園對出迴旋處出現全港第一塊啡色路牌。社長當堂嚇一跳,一直FF嘅畫面終於出現了(感動中)。嗱,講明先,啡色路牌並非羅湖橋以北嘅專利。咁究竟啡色路牌係何方神聖呢?

啡色路牌最早於70年代嘅法國出現,用於旅遊景點、歷史建築等;後來英國、中國、澳洲等地都有採納。啡色路牌主要指向特定旅遊目的地、又或者具有特殊主題嘅渡假路綫、預告附近景點或城鎭。如果你去到外國自駕遊,呢啲啡色路牌就好幫到手;搵路之餘,仲可能發掘到你唔知嘅景點添。

1_sbvtGr3IqSPXRU3q-Ze1ycQ
海洋公園道附近兩個迴旋處出現全港首批啡色路牌,左右兩塊分別喺十二月及一月安裝。
路牌設計改善建議

塊牌換咗成幾個月,點解今日先出文?因爲社長想親眼望到塊牌先寫篇文,第一眼都覺得幾靚,例如用啱字體、排版都算唔錯(其實近年啲路牌都唔差,祇係間唔中突然有幾塊出事)。不過社長覺得設計尙有改善空間,針對左手邊呢塊採用僑福規則(註)嘅路牌:

1_PUojJmkf84atBtOrzhONEw
左邊係現行設計,右邊係本社改善建議,針對方塊四角、字重、圖案位置作改善。

路牌上有少少細節位感到礙眼;例如白色路牌入面嗰個啡色方塊起晒角,同路牌嘅圓角風格唔一致。不過香港嘅僑福規則路牌其實都非常之唔統一,例如藍底路牌嘅白色方塊就起角、綠色就圓角。

圓角方塊

當然最好嘅方法就全部統一用晒圓角啦,不過要畫圓角都好講究㗎,唔係求其較圓啲就可以。我哋建議就沿用英國僑福規則對方塊嘅圓角,無 border 嘅方塊孤度應該爲 1 sw。

When a border is not required the corner radius of the panel is 1 sw.

「咪住先?乜嘢係 sw,可唔可以講淸楚先?」

1__giXWvUDA-3tb_9Zz-QXrA
根據《Traffic Signs Manual: Chapter 7 — The Design of Traffic Signs》,1 sw = ¼ x-height。

The unit of measurement when designing a sign is the stroke width (sw) which is one quarter of the x-height and is not necessarily equivalent to the width of any given character.

根據英國路牌設計指引《Traffic Signs Manual: Chapter 7》,SW 全寫 Stroke width;係路牌設計常見嘅單位。咁 1 sw 卽係幾長?按英國標準而言,1 sw = ¼ x-height;卽係話 4 sw 等如一個細楷 x 嘅高度(x 字高)。所以 sw 單位同 x 字高掛勾,英文字幾大,sw 就幾大。

中文應分粗幼

香港路牌嘅英文字體 Transport 喺設計時特登設計咗兩個字重(粗幼),分別 Medium 同 Heavy。比較幼嘅 Medium 用於深色底白色字;粗體 Heavy 用於淺色底黑色字。

設計出兩種粗幼,是爲了應付光暈(Halation)問題,路牌採用反光物料,在強光下鮮色部分會溢出,變相加粗字母。相反,淺色路牌用黑色字 Heavy 的原因,就是避免路牌底色蓋過字母,影響可讀性。
(原文抄自己本書)

其實近年大部分生產嘅路牌都好乖,有跟足指引;藍底白字用 Medium、白底黑字用 Heavy。不過英文字體就有標準,但香港長期「重英輕中」嘅情況下,中文就缺乏呢方面嘅考量,無論咩底色都係用全眞粗黑體。

肉眼睇,你會覺得「警察學院」幼啲、「海洋公園」粗啲;但其實兩個一樣咁粗,大家都係全眞粗黑體。要解決呢個問題,折衷嘅方法就係「海洋公園」用幼啲嘅全眞中黑體。不過長遠嚟講,香港需要設計一套針對公路可讀性嘅中文字體。

其他小問題

其實成塊路牌除咗上述兩樣之外都無咩大問題,不過少少細節位可以執執。例如現行版本嘅海馬標誌偏低,我哋建議稍爲移高返啲置中。另外,塊啡色望落去就比英國版深色咗啲,不過呢個就係物料問題,唔關電腦配色事。


經典海馬標誌重現
1_0NLW4BtJ8VBR0D6W-jflaA
海洋公園舊 logo(1984年版)最爲人熟知就係海馬標誌,不過係 2000 年就被威威獅令取代咗。

OK,講完長篇大論嘅設計問題,可能大家都悶喇。咁輕鬆少少,講下大家鍾意嘅「集體回憶」啦。個人認爲,最代表到海洋公園就係海馬標誌,所以又會被稱爲「海馬公園」。

曇花一現:南港島綫

1_q_dhW395nFI3T5d-nGqMcA
2014年,未通車嘅南港島綫車廂。路綫圖見到海洋公園左邊有個海馬標誌,但最後通車前就無咗影。(微博相片)

但係似乎大家都唔記得,呢隻海馬 logo 經已響廿年前被威威獅令取代咗(講眞我個人覺得威威獅令眞係好樣衰)。所以路牌上嘅海馬標誌,某程度上嚟講都係復古。不過其實響 2014年,南港島綫車廂內籠曝光;當時車廂路綫圖中,海洋公園站係配有海馬標誌,好似迪士尼站、機塲站、昂坪衫碌拎咁。但係最後通車,個海馬標誌就消失咗;相信係因爲海洋公園標誌 N 年前經已棄用海馬。

其實近年設計流行平面化,現行海洋公園個 logo 好似同時代有少少脫節咁。唔知海洋公園有無興趣趁機復用隻簡約風格嘅海馬標誌呢?(大大話話成百億,唔知有無空餘錢做下形象翻新呢?)

BTW,希望海洋公園唔好封殺隻海馬標誌,話晒係社長嘅童年回憶嚟。


未來香港嘅啡色路牌?
1_Zv4LJlgvsgo1emmBWo8nAw
英國嘅啡色路牌都配有唔同標誌(圖片來自 SABRE)

樂見今次運輸署嘗試新設計,啡色路牌一來可以有效將路牌資訊分類外,二來亦可以爲大家重新發掘香港嘅景點,唔淨止鄰國旅客去嘅地方,香港仲有好多好地方値得我哋去探索。希望運輸署會採納啡色路牌爲正式標準,逐步改善香港嘅路牌設計。

英國嘅啡色路牌通常都配有圖案,畀人可以知道係咩類型嘅景點。繼今次海洋公園用海馬標誌後,唔知未來會唔會繼續爲旅遊景點設計標誌呢?

N年前社長嘅終極幻想

11_bjEIu6GJ9gchfUPHEFZZOA
香港幾時可以全面推行啡色旅遊景點路牌呢?

十幾年前迪士尼樂園開幕,當時好多指去機場嘅路牌都加上迪士尼標誌。當時心諗:「使唔使啊?第時開埋馬灣公園係咪又要加標誌?」隔多年濕地公園啓用,指向天水圍嘅路牌都變成「天水圍及濕地公園」,搞到濕地公園好似獨立於天水圍咁。之後再加埋深圳灣,搞到塊路牌一堆字都睇得唔淸楚。由於路牌太多多餘資訊,啡色路牌或者可以減省路牌上嘅文字?至少唔係「天水圍及濕地公園」先……

點解香港路牌設計好似好差?香港係雙語城市,路牌要同時兼顧中英文;相反英國淨係用英文,排版相對都簡單啲(就算蘇格蘭、威爾斯嘅雙語都係拉丁字母)。而香港仲係喺摸索中嘅楷段,仲有好多改善嘅空間。

最後一句,有朋友笑稱「運輸署係咪睇咗你本書先至整咗啡色路牌」。係都好吖,係嘅話就多謝晒啦 XD 。

註解:

僑福規則(Guildford Rules),對應香港用法即係多種顏色並存嘅路牌。例如藍底路牌配有綠色方塊,代表路牌所在地爲普通道路(藍色),目的地經由快速公路(綠色)。

文章獲作者授權轉載,作者Medium

責任編輯:Alvin
核稿編輯:Alex