地產霸權再出發:土地共享之官商勾結「友嘉」冇減

地產霸權再出發:土地共享之官商勾結「友嘉」冇減
Photo Credit: Reuters / 達志影像

我們想讓你知道的是

委任左黃友嘉做土地共享顧問小組主席,可見政府喺土地共享嘅立場,根本唔係咩籍私人土地起公營房屋。

當初政府搞「土地共享」,話要「善用私人市場資源補足公營房屋供應」,死都唔肯用收回地產商囤地,過程中由顧問小組提供第三方意見,釋除官商勾結嘅疑慮。今日剛剛就委任左黃友嘉做土地共享顧問小組主席,睇番佢過往對發展商囤地嘅態度,就令人好懷疑,到底佢係避免,定係加劇緊官商勾結既嫌疑?

2012年,黃友嘉時為工商專聯主席,佢曾經代商界推銷公私合營發展新界農地。當年工商專聯回應政府的「優化土地供應策略」時,曾在文件[1]最後一段提到發展商擁有大量農地。煞有介事咁話「雖然公共關注同觀感都重要」,政府可以以「彈性嘅方法處理」新界農地,以釋放更多土地。佢仲提到透過仲裁機制以釋除政府偏袒地產商嘅公眾疑慮。

然後今日黃友嘉做土地共享顧問小組主席。呢份文件清楚顯示,黃友嘉嘅取向本身就企喺幫工商界嗰邊(工商聯會主席喎大佬),最早期揾方法釋放啲新界囤地;個仲裁機制根本只係整色整水比人覺得政府唔係傾向地產商利益,而唔係用嚟制衡發展商。試問黃友嘉點做到「保障公眾利益」同埋「提供第三方意見」以上兩點?

95872702_3036338323128887_18273051318471
圖片由作者提供

再睇返黃友嘉對於成個香港土地房屋問題嘅取態,就知道政府其實都係想搵返個自己人:

  • 黃友嘉多次明確表示應該開發郊野公園[2][3]。蘋果發現黃友嘉擔任副會長嘅「香港專業及資深行政人員協會」喺2018年「土地大辯論」嗰陣表明支持土地共享,同時對發展粉嶺高球場建議有保留[4]
  • 2018年,施政報告講到明日大嶼,黃生順應土供組「土地供應不足」嘅論述,大大力支持填海人工島,期間仲講出「我唔知係咪有一個叫地產霸權嘅存在」[5],睇嚟佢唔單止覺得地產商無問題,仲認為填海唔會助長地產商添。

土地共享✅、郊野公園✅、反對發展粉嶺高球場✅、否認地產霸權✅。中晒!市民反對嘅佢就支持,市民支持嘅佢就反對,跟足政府條line,試問點保障市民利益,釋除官商勾結嘅疑慮?

從政府委任自己友做主席呢個行為,亦睇得出政府喺土地共享嘅立場,根本唔係咩籍私人土地起公營房屋,而係赤裸裸地貼大床送基建,運用公權幫地產商釋放囤地,官商勾結寫到上額頭。死都唔肯乖乖地用《收回土地條例》一嘢收返啲地產商囤地,整合規劃做公屋發展計劃,攞返土地發展主導權。

注釋:

  1. BPF Response to Government Consultation “Enhancing Land Supply Strategy” March 2012
  2. 「雙辣招」壓樓價權宜計無礙營商(文滙報,23-10-2013)
  3. 香港「地少人多」的迷與思/文﹕黃友嘉(明報,13-12-2011)
  4. 土地共享先導計劃明起接受申請 顧問小組首曝光主席為積金局黃友嘉(蘋果日報,5-5-2020)
  5. 【地產霸權】填海會助長地產霸權?(政策.正察YouTube)

本文獲本土研究社授權轉載,題目與內文由編輯所擬,原文見

相關文章:

責任編輯:Alex
核稿編輯:Kayue