青年宿舍地產煉成:政府一直用生活成本迫走青年

青年宿舍地產煉成:政府一直用生活成本迫走青年
Photo Credit: Reuters / 達志影像

我們想讓你知道的是

民政事務局2016年上立法會爭取撥款的文件紀錄時,曾經話過大埔青年宿舍PH2一人單位每月租金大約2,300元,到今年正式入伙,實際租金就變成4,248至5,831元,單單租金最便宜單位也加價約八成半。

林鄭政府近年開始將部分房屋政策嘅責任外判,推出咗林林種種首置樓、過渡性房屋、貨櫃屋、青年宿舍等等。其中2011年施政報告出台嘅青年宿舍政策,首個項目已經交由香港青年協會負責統籌,位於大埔寶鄉街2號嘅青年宿舍將會喺今年第二季入伙。

好多人未必知道,青協會長正正係鼎鼎大名想喺南生圍起豪宅嘅地產商溫文儀,而佢哋副會長更加係DQ議員嘅立法會秘書長陳維安,究竟第一個青年宿舍項目嘅具體狀況又係點呢?

大埔青年宿舍(PH2)合共提供80個單位,樓高20層,地下至3樓分別用作青年服務空間,4至19樓就係宿舍的居住單位,分別有76個一人單位(188-232呎)、2個二人單位(398呎)、同3個三人共住單位(155-189呎)。根據青協在2020年3月更新的PH2租金一覽表,三種單位嘅租金分別係,一人單位 4,248至5,831元,二人單位8,670至8,711元,共住單位每人4,606至5672元,按一般地產訂價邏輯推斷,愈高層愈貴,全數出租一年可收467萬。

當民政事務局喺2016年上立法會爭取撥款的文件紀錄時,曾經話過大埔PH2嘅一人單位每月租金大約係2,300元[1],到今年正式入伙,實際租金就變咗4,248至5,831元,單單最平個間都加咗八成半,政策文件誤導程度同高鐵客運量有得揮。

98294101_3083829611713091_69892971022285
圖片由作者提供

2019年香港劏房租金指數調查,劏房戶平均每月租金約5,030元,平均面積132.2呎。大埔青年宿舍(PH2),對比私人劏房,大埔青年宿舍,其實只係大小小,平少少,定價貼近劏房水平。

睇番整個發展過程,原址前身係獅子會大埔青年空間。政府喺2018年2月免地價修改地契[2],再喺2016年以基本工程儲備基金以及獎券基金進行撥款,分別支付宿舍單位同社福設施樓面嘅所有發展成本,工程費用總額為1億7,490萬元[3]。話青協以自負盈虧形式營運根本完全係誤導公眾,土地係免費嘅,建築工程又係政府出嘅,所收嘅租扣除燈油火蠟基本上係「剩袋」。簡單嚟講就係政府出樓比佢收租,借幫青年之名搞地產,cap青年階層油水。

加上青協財政狀況好唔透明。2018/2019年度開支5.6億[4],但只有涉及2.9億嘅一筆過撥款有完整財務報告[5]。其餘嘅支出只係經年報用三小段去粗略交代,收到嘅租金最後會點樣畀青協洗咗去邊大家都唔會知道。單單係機構嘅一筆過撥款報告已經披露,青協年薪七十萬以上嘅高層人數有79人,年薪一百二萬以上高層更有7人,青協「自負盈虧」不受監管嘅開支部分,當中厚薪高層數目仍然係未知數,透過青年房屋所賺嘅錢,公眾未必監管到。

政策目的原意係協助青年擁有自己的居住空間,同時方便佢哋儲蓄去發展個人中期目標。每次簽約租期2年,每人最多租5年,未儲到錢又要搵地方搬。

目前仍然有六個青年宿舍項目未完成,除咗保良局元朗青年宿舍項目正在動工之外,其餘5個項目(上環、旺角、佐敦、元朗、灣仔)都係處於「前期工程階段」甚至未有時間表。第一個項目就搞到咁樣,政府全資起嘅年青房屋都可以收貴租,係咪配合緊將香港青年迫上大灣區住嘅國家政策呢?

注譯:

  1. 立法會民政事務委員會 青年宿舍計劃 – 香港青年協會的建造工程 二零一六年 三月 二十四 日 討論文件立法會CB(2)1125/15-16(02)號文件
  2. 二零一八年度 已簽立的契約修訂個案
  3. 同註1
  4. 香港青年協會 2018-19 年報
  5. 香港青年協會2018-19年度受社會福利署資助財政報告

本文獲本土研究社授權轉載,題目由編輯所擬,原文見

相關文章:

責任編輯:Alex
核稿編輯:Alvin


猜你喜歡

Tags: