地產商又贏——國安法下投英中港地產商食盡兩家茶禮調查報告

地產商又贏——國安法下投英中港地產商食盡兩家茶禮調查報告
Photo Credit: Reuters / 達志影像

我們想讓你知道的是

香港人於英國分分鐘又係對住番同一批支持《港區國安法》地產商起既樓,命運就似乎永遠要同同一班地產霸權永續紏纏。

國泰港龍大裁員、匯豐中英夾攻令股價前途暗淡之際,好少人留意原來有一大堆中港地產商依然能邊撐《港區國安法》,一邊大舉投資英國地產發展食兩家茶禮,長袖善舞得惹人妒忌。

我們大舉翻查中港地產資本自2019年起在全英國落成及預計落成嘅住宅單位,發現有成合共超過至少56,600個,當中近八成單位(44600個),都係來自力撐《港區國安法》嘅遠東、長實、新鴻基,及新世界[1]嘅港資大地產商,私樓供應量堪比在港地產業務,而且唔少單位兩三年前已經計劃就緒,2020年開始逐漸落成,收成期加埋《港區國安法》逼出來既港人移民潮,香港人到咗英國分分鐘又係對住番同一批地產商起既樓,命運就似乎永遠要同同一班地產霸權永續紏纏。

相關單位表列如下:

投英排行榜——發展商2019年後在英國落成及預計落成的住宅項目(發展商,項目數目,單位數目):

  • 遠東發展,6個項目,共約21,300個單位
  • 新世界,1個項目,共約17,500個單位
  • 長實,3個項目,共約4,200個單位
  • 新鴻基,2個項目,共約1,600個單位
  • 萬科,13個項目,共約3,000個單位
  • 富力地產,3個項目,共約2,000個單位
  • 富力地產與中渝置地合作,1個項目,共約1,900個單位
  • 綠地控股,1個項目,共約861個單位
  • 保利地產,1個項目,共約788個單位
  • 碧桂園,1個項目,共約782個單位
  • 太一地產,4個項目,共約713個單位
  • 得寶資本集團,2個項目,共約529個單位
  • 百達林國際,4個項目,共約437個單位
  • 鑫苑中國,1個項目,共約423個單位
  • 中渝置地,1個項目,共約153個單位

(中港地產商在英國的住宅項目列表:https://bit.ly/31r9Rp8

(中港地產商在英國的住宅項目分布地圖:https://bit.ly/3mdi2NZ

122136873_3515355445227170_3925940855126
圖片由作者提供

當中有21,300個單位(佔38%)屬於「港資」地產商遠東發展,坐擁同Manchester City Council傾好合作發展成155公頃既Northern Gateway項目[2],主席邱達昌不諱言承認係食正條水。在7月頭信報周刊專訪中,邱達昌一邊話《港區國安法》保障安定繁榮,轉個頭就話「如果英國嚟嗰300萬個BNO,你就賣到手軟!」[3],可謂食人血饅頭之最。

而誠哥著名嘅香港城Convoys Wharf計劃,今年6月底正式攞到開工紙,矚目一時。此外,新世界Greenwich Peninsula、新鴻基Goodluck Hope同Lillie Square亦喺2018至23年間逐漸建成入伙,夾埋近二萬個單位,全部都係主動出過嚟撐《港區國安法》,撐完之後又有班「英國投資顧問」推介香港人買番同一班中港地產商既樓,可謂移民潮之下既港版資本內循環。

其他榜上有名既中港發展商雖未有公開撐《港區國安法》,但都靜靜雞食住個勢,例如總部設於香港既百達林國際,佢地2020下半年英國房地產嘅市場展望中,講到明「最近的新送中條例」(“...more recently the passing of a new extradition law with China...”,撰文於7月24日,相信是指《港區國安法》)會令更多人投資英國,食住個勢吹捧英國市場。[4]而業務橫跨中港嘅太一控股更早著先機,2019年開始推出英國住宅,於2020年6月底預祝未來喺英國上市,仲搵埋陳豪喺香港宣傳佢地喺英國來年落成嘅樓盤Lincoln House。連同其他項目,太一即將有713個英國單位喺2020至23年落成,唔怪得佢一年以來發佈咗44條片講英國物業投資,起勢咁sell英國樓。[5-6]

此外,中資亦都有唔少投資項目,例如萬科、富力,同有稱「重慶李嘉誠」嘅中渝置地,夾埋都有成7,437個單位。而英國政府似乎暫時都幾welcome以上所有中港地產商黎炒起英國樓市,所以遠東邱達昌都重大搖大擺話外國「唔係話制裁,就制裁到」。[7]但其實以上項目有相當部分仍在計劃階段,仍存在變數,實在唔好低估英國政府/民間攬炒呢啲發展項目嘅可能性,城規體制都可以令計劃隨時卡著。各大中港地產商唔好坐定粒六等收割,咁張揚食兩家禮嘅真係好自為之。

注釋

  1. 李嘉誠:國安法促進香港穩定發展(28-5-2020,文匯報)
    鄭家純:香港國安法利長期繁榮穩定(2-7-2020,文匯報)
    邱達昌:國安法令港安定繁榮(6-7-2020,文匯報)
    郭炳聯:港版國安法可締造安定有序的投資及營商環境(26-5-2020,經濟日報)
  2. Development - Northern Gateway
  3. 遠展料放寬BNO旺英樓市(6-7-2020,信報)
  4. Platinum Rise Real Estate - A Q3 Market Outlook Post-COVID-19
  5. 太一控股集團預祝英國上市,以成本價讓市民購入英國物業(22-6-2020,經濟通)
  6. 太一控股集團 Facebook 影片
  7. 有線寬頻主席丹斯里拿督邱達昌 談港區維護國安法 - 聲東擊西 EP8 香港開電視

本文獲本土研究社授權轉載,原文見

責任編輯:Alex
核稿編輯:Alvin


猜你喜歡

Tags: