「後日大嶼」——起好入伙時,人口隨時已開始下跌

「後日大嶼」——起好入伙時,人口隨時已開始下跌
Photo Credit: AP / 達志影像

我們想讓你知道的是

點解政府唔正正經經解決今日嘅房屋問題,而將個寄望放喺一個不會解決房屋問題嘅島上?

政府成日話要解決今日嘅房屋問題,所以十幾年後起個島俾大家,已經令人搲爆頭,但明日大嶼嘅破綻可止呢一個?

舊年3月發展局局長黃偉綸推銷明日大嶼個陣時話,2032年有首批居民入伙,但原來今日施政報告,林鄭「靜靜雞」將入伙日期延至2034年,原因冇解釋,但研究都未做,工程都未開始,入伙日期已經延遲,明日大嶼變「後日大嶼」,林鄭果然係攞第一嘅。

126806525_3610920472337333_8304515876332
圖片由作者提供

既然政府話明日大嶼係應付增加人口,咁我哋應該認真睇番統計處最新人口估算。今年9月,政府公佈《香港人口推算2020-2069》,香港人口會喺2039年到頂(809.7萬)[1],並會續年下跌至2069年嘅735.1萬,人口比現在更少。即意味政府今日最樂觀的入伙時間2034年,之後只有短短5年時間,人口便會開始下跌。

127180886_3611632898932757_7050936918415
圖片來源:香港政府統計處

而且根據往績,長期人口估算有高估後再調低嘅傾向[2],難保未來會再調低2039年嘅預計人口,或者人口頂峰會提早出現。而根據過往經驗,越大型嘅基建,工程延遲嘅機會亦越大,隨時竣工時香港人口已經逐漸萎縮。令人不禁質疑,點解政府唔正正經經解決今日嘅房屋問題,而將個寄望放喺一個不會解決房屋問題嘅島上?

爭議再拖落去,呢啲問題將會逐步露餡,怪不得林鄭話明日大嶼已經「曠日持久」,巴不得速戰速決。

註釋:

  1. 香港政府統計處:香港人口推算2020-2069
  2. 姚松炎:十八年來香港人口首次下跌(11-9-2020,香港獨立媒體)

本文獲本土研究社授權轉載,題目由編輯稍作修改,原文見

相關文章:

責任編輯:Alex
核稿編輯:Alvin


Tags: