淪為施政報告背書讀稿機?長遠房屋走數策略大檢閱

淪為施政報告背書讀稿機?長遠房屋走數策略大檢閱
Photo Credit: AP / 達志影像

我們想讓你知道的是

今次長策並沒有真正檢視330公頃每一塊土地的列表同具體發展狀態,如果根本就冇睇過330公頃每塊土地,咁其實只係幫施政報告背書,完全失卻咗原有長策製訂及檢視長遠目標的功能。

12月16日運房局局長陳帆發佈《2020年長策週年報告》,好多新聞冇提及嘅細節,值得分享比關心香港房屋問題嘅朋友關注一下。

十年房屋供應目標43萬:明顯受人口下降影響

今次長策公佈主要重點,是十年房屋供應目標由2014年的48萬修改至今年的43萬,即係未來十年每年單位供應平均少足足5,000間,條數細咗容易達標當然是王道。

而事實上,下調房屋供應目標嘅主因,係因為住戶數目淨增長由282,800大幅下跌至205,200個,五年間直接同人口/住戶組成有關的房屋需求因素足足減少77,600間屋,重未計未來可能出現嘅移民潮。

回帶番,當政府推銷「明日大嶼」個陣,就成日話人口下跌唔會減少房屋需求,因為平均家庭人數會下跌所以供應量不減,但今年長策供應目標大幅下調,反證「明日大嶼」解決長遠房屋需求理據更加薄弱。

131016036_3668364806592899_4023857129348
圖片由作者提供

幫施政報告背書:330公頃公營房屋土地達標?

長策房屋供應數目長期不達標(5年公營單位預計供應10.1萬,達標率:64.1%),今年施政報告就強調今次已經搵足31.6萬間公營房屋需要嘅330公頃土地,基本上就抄咗林鄭個份施政報告照單全收。

但係,今次長策並沒有真正檢視330公頃每一塊土地的列表同具體發展狀態,過往亦有大量土地發展規劃失蹤流產改做豪宅嘅例子比比皆是,究竟長策委員會憑什麼咁有信心係冇水份?如果根本就冇睇過330公頃每塊土地,咁其實只係幫施政報告背書,完全失卻咗原有長策製訂及檢視長遠目標的功能。

明日復明日:不斷將供應目標推後5年

今次長策再一次將大家解決房屋問題嘅寄望推後至少5年:未來五年起10萬間,之後五年先會追番20萬間,即係話之後五年每年落成量會突升一倍,又冇兌現公開具體土地列表清單,你信唔信呢?

睇番以往長策估算,2014年當年已經聲稱「政府已覓得土地,在 2015-16至2024-25年度興建254,000個公營房屋單位」,但我地fact-check番2015至2020年間個公屋單位落成量,基本上只係完成到預測嘅73%:

  • 房委會實質建屋量(15/16-19/20):82,102
  • 房協實質建屋量(15/16-19/20):3,070
  • 2020長策預房委會+房協(20/21-24/25):101,300
  • 總計(15/16 - 24/25):186,472 (73%)

然後個長策唔再檢討過往有幾多係做唔到嘅原因,5年過後,跟著再次話「搵夠地」叫你信未來5年就會有足夠供應,風水佬呃你十年八年,發現走數之後又已經改朝換代。

正式宣佈走數:元朗橫洲翻版、收回地產商農地失蹤

政府聲稱自己積極覓地,但今次長策文件報告正式承認8塊短期棕地,只有「大部分已經開展可行性研究」,好可能個塊由新世界相關人士持有部分土地的「屏山棕地群」被抽起說要「適時公佈」,單係呢塊足足少咗18公頃,分分鐘又成為官商鄉黑橫洲翻版。

去年施政報告,林鄭提及過會敢於動用《收回土地條例》,考慮收回規劃上適合發展但丟空多年的私人農地,然而今日長策記者會中改口「部份已被私營發展商『發展得成熟』,因此只能收回部份土地」,講到明專避開收地產商囤積合適發展做公屋土地,可以預視未來林鄭土地房屋政策會全面向土地利益傾斜,白白浪費收地解決房屋問題的機會。

結論:長遠房屋策略本來是用來提議及監督政府,今日已經淪為一份每年更新一次的施政報告讀稿機。

相關新聞:未來10年總房屋供應目標43萬單位 公私營房屋維持七三比(16-12-2020,明報)

本文獲本土研究社授權轉載,題目由編輯稍作修改,原文見

相關文章:

責任編輯:Alex
核稿編輯:Alvin


猜你喜歡

Tags: