港府宣布收回3塊新界地:地產商「投資失敗」都有安慰獎收?

港府宣布收回3塊新界地:地產商「投資失敗」都有安慰獎收?
圖片由作者提供

我們想讓你知道的是

根據《收回土地條例》,行政上地主並無「反對機制」,但香港政府收地竟可以拖兩年,甚至係預先放風?

上星期五政府宣布從新鴻基與新世界等手中收回3塊新界地,包括元朗YOHO Midtown旁核心地段,興建公共房屋。

睇落好似政府重手出擊「打地主」(連YOHO MidTown旁黃金地段都收!),「重創」地產商發展大計,起公屋拯救水深火熱嘅基層市民?事情當然冇咁簡單。

呢3塊地,其實已經係政府2年前表示會收嘅10塊地當中嘅3塊[1],並唔係新嘢:

我們會檢視那些規劃上可作綜合發展區或住宅(甲類)發展,而地積比率比較高(一般而言,市區為7.5倍或以上,新界為5倍或以上)、現有構築物比較低矮(如只有幾層樓高),但有關業主**未有確切發展計劃的土地**。現時資料顯示,約有10組地塊符合這些條件。

(發展局:局長隨筆,2019年10月20日,強調由作者加上)

然而,現在不單止係拖延咗2年,仲要得返一半都無。林鄭當時高調喺施政報告公佈計劃時嘅「全力以赴」增加公屋供應嘅精神,已經燃燒殆盡。

更加嚴重嘅係,《南華早報》剛剛揭發[2],原來呢3塊地似乎係地產商眼中發展唔到嘅「豬頭骨」地,對於地產商「可有可無」,政府主動收地仲可以幫手收拾殘局。

184825255_4100963576666351_2097739849293
圖片由作者提供

發展商收唔到「祖堂地」始「同意」政府收地

《南華早報》引述新鴻基發言人[2],承認原來位於YOHO Town旁、5400平方米嘅地段之所以丟空多年,係因為當中夾雜「祖堂地」。「祖堂地」出售門檻高,似乎新鴻基無法收購餘下地段發展,而手持地段亦不足以發展私樓,結果土地丟空多年。所以對於地產商來講,呢啲土地已經係冇價值既「豬頭骨」,直接啲講就係投資失敗。政府現在出手收購土地,仲可以獲港幣2000萬收地賠償(公帑支付),好過渣都無,猶如安慰獎。

另有3塊土地因地主提出發展申請放棄收地

值得注意嘅係,輿論集中喺被收嘅嗰3塊地,往往很容易忽略為何事過2年,仍然有7塊地收唔到。政府喺一份新聞公報[3]簡單交代咗嗰7塊土地嘅情況,但唔肯提供完整資料。當中3塊政府已表示放棄收回,即係公屋供應又少咗一截啦。

究竟點解?原來係因為嗰3塊地嘅地主,喺林鄭2年前宣布收地之後,提交咗地契修訂/換地申請(即發展申請),但嗰3塊地位置在哪裡、地主是誰,就因為「商業敏感性」而不公開,公屋供應變相畀地主(發展商?)搶走咗。

奇就奇在,點解過去2年公眾一直唔知呢幾塊土地喺邊度,到今日都唔肯講,但呢3塊地嘅地主竟然會識喺呢2年期間提交發展申請,卡住整個收地過程?一塊地係咁仲可以話咁啱得咁橋,但3塊地同時係咁,「撞彩」嘅機會甚低。

RTX717BM
Photo credit: Reuters/達志影像

唔公佈放棄收地詳情 引官商勾結嫌疑

所以,呢3塊避過收地一劫嘅土地嘅業主係邊個、位置喺邊,係關鍵所在。如果相關土地不牽涉「祖堂地」,或原來又係某幾個大發展商持有,即代表呢啲避過收地一劫嘅土地,其實係發展商眼中嘅真正「靚地」(否則亦唔會提交換地申請同修改地契,準備發展)。

政府拒絕公佈呢幾塊避過收地嘅地塊嘅詳情,咁自不然會惹起公眾質疑,政府今次「十塊收三塊」嘅決定,係咪為某啲發展商度身訂造,令發展商既可以獲公帑包底,交出「豬頭骨」地,亦可以「保住」靚地自己起私樓,同時政府又可以獲得掌聲(被鬧咁耐終於肯收發展商嘅地!)嘅「三贏方案」,如果屬實,簡直係一場精心策劃嘅PR stunt。

要強調一點,根據《收回土地條例》,行政上地主並無「反對機制」,而且收地無理由可以拖2年,甚至係預先放風,留有空間俾地主「做嘢」、同政府討價還價,或提交發展申請,卡住整個收地過程。

政府應立刻公佈被「放生」地段位置在哪,以釋除公眾疑慮,否則不要怪市民質疑是次選擇性收地,其實真係官商勾結。

注釋:

  1. 局長隨筆:善用公權收回土地 發展公營房屋(香港發展局,20-10-2019)
  2. Major Hong Kong developer to release land for public housing, day after government says it will seize lots left idle for decades (14-5-2021, South China Morning Post)
  3. 收回位於粉嶺及元朗的三組地塊(13-5-2021,香港特别行政區政府新聞公報)

延伸閱讀:

文章獲作者授權轉載,題目由編輯稍作修改,原文請看作者Facebook

相關文章:

責任編輯:Alex
核稿編輯:Alvin


Tags: