將軍澳路牌排版亂,最致命係指錯方向(附改善建議)

將軍澳路牌排版亂,最致命係指錯方向(附改善建議)

我們想讓你知道的是

路牌唔係大塊就易睇。亂排版嘅話,幾大塊都好難睇。

撰文:Gary Yau|圖片提供:Jacky03|聯絡:Pak Hin Law

上星期,我哋介紹咗將藍隧道一塊排版混亂嘅龍門架路牌。而今日再講埋另外一塊設計失誤嘅將藍路牌。

228786858_6212715105420189_4622885993198

呢塊長型路牌(Stack-type sign)位於翠嶺路東行,近寳邑路、寳順路交界;當將藍隧道通車後,駕駛者可以響呢度轉右上P2路直出藍田。雖則對比上星期塊龍門架路牌,呢塊牌未有用錯字體,不過依然係有啲設計失誤。

一、致命失誤——直行轉右分不淸?

點解有兩個直行箭咀?唔使多講,好明顯又係整錯野。最底嗰格「工業邨、九龍、香港(東)」supposed係轉右,就連飛機標誌都識指向右,但係偏偏箭咀唔記得rotate 90°。

二、幹綫加括弧變「螃蟹路盾」?

點解中間嗰格「九龍」嘅七號幹綫路盾會有括弧,但下面又無呢?其實參照英國標準,「幹綫編號加括弧」代表條路唔係直入幹綫,需要經過普通道路(或第二條幹綫)先可到達。以呢塊牌爲例,轉左去七號幹綫前,需要行駛一段寳順路,中途亦有一個迴旋處同一個路口。相反,轉右就已經可以直上六號幹綫,就唔需要括弧。

呢塊路牌相信係香港首塊首次應用「括弧幹綫」呢個槪念嘅路牌,而社長都幾贊成利用「括弧幹綫」去減省文字。但好可惜地,唔知做咩要用上面兩個括弧,搞到成隻螃蟹咁,其實一個括弧就可以。

三、排版失誤——離行離捺

一塊路牌可讀性高定低,好取決於佢嘅排版,而呢塊路牌嘅混亂排版就更加唔使講。從圖片上可以見上,路牌開咗四個窿,其中三個窿係用嚟安裝「行車時間顯示系統」(Journey Time Indication System,下稱「JTIS」),分別係用於顯示經六、七號幹綫前往九龍、香港(東)嘅時間,可以畀駕駛者決定行邊條隧道出九龍。

你會發現呢個JTIS顯示器佔嘅空間比地名仲要高,所以導致成塊牌嘅地名變得離行離捺。其實原先呢款JTIS顯示器嘅體積咁大,係為快速公路度身訂造(對應公路上嘅字體會再大啲,增加可視距離。但係套用喺普通道路上,呢個JTIS顯示器就會顯得太大。

其實最好辦法係參考興發街JTIS做法:將顯示器獨立成第二塊路牌,以避免因爲顯示器體積過大而影響地名排版。

四、改善建議

225834739_6212716712086695_4024733784315
  1. 參考興發街做法,將JTIS獨立成第二塊路牌,咁就唔會影響到路牌嘅排版。另外JTIS輔助資訊以圖案爲主,例如「隧道+七幹」、「隧道+六幹」、「東隧標誌」等。
  2. 「Tseung Kwan O Station」屬於超長地名,佔嘅空間相對較多;分行處理可以將塊路牌「減肥」。
  3. 「九龍(經七號幹綫)」用一個括弧就可以;另外,原路牌漏咗隧道標誌。
  4. 工業邨加返標誌。
  5. 六號幹綫標誌放響向右箭咀下面以節省空間。此乃參照運輸署指引《Transport Planning & Design Manual》(簡稱TPDM)做法。
  6. 飛機放左邊、隧道標誌放右邊,以留空足夠空間畀隧道標誌上面安裝兩盞燈。

五、結論

路牌唔係大塊就易睇。亂排版嘅話,幾大塊都好難睇。

【廣告】:路牌點樣排版先至好睇,響《香港道路探索(增訂本)》都有詳細介紹,有興趣可以買返本(各大書店有售!)

文章獲作者授權轉載,作者Facebook

責任編輯:Alvin
核稿編輯:Alex


Tags: