部分崩了:明日大嶼連第一期1000公頃都會再縮水?

部分崩了:明日大嶼連第一期1000公頃都會再縮水?
Photo Credit: Reuters / 達志影像

我們想讓你知道的是

政府其實明明已經俾咗5.5億公帑做前期研究,研究範圍應理包晒1,700公頃,依家減完700公頃又疑似再縮水,最開心好可能係負責做研究嘅顧問公司,竟然有咁便宜嘅生意。

近日林鄭一手捧紅嘅1,700公頃明日大嶼,其中700公頃突然話「第二日再諗」,令公眾關注明日大嶼呢個「親生仔」會唔會有頭無尾甚至胎死腹中。我哋近日翻查最新《香港2030+》[註]嘅設計構思圖時,發現疑似又有機會出現填海計劃大縮沙。

報告中交椅洲人工島配圖同原擬填海位置有頗大出入,對比本來明日大嶼填海位置,大交椅州應該四周都被包圍,但依家報告中就少咗大交椅州以東嘅填海區,保守估計隨時又少約200公頃地。配圖下方雖然寫住「僅供說明的構思圖」(Artist impression for illustrative purpose only),但同明日大嶼預計填海位置咁大出入,好似隨便搵張圖交功課咁,當初勢如破竹嘅填海諗法係咪已經跌咗落海?

245266058_4564148543681183_1887996236765
圖片由作者提供

認真翻查海事處出版海圖,發現現時消失咗嘅交椅州以東填海區,其實係整個明日大嶼填海計劃中最深嘅位置,可以有成十米以上。意味住該位置可能係整個計劃中用到最多填料,最具技術困難,亦即係成本最高嘅位置。依家張圖突然少咗忽係咪預言明日大嶼將會出現「部分崩了」嘅情況?當初嘅明日大嶼「願景」已經由「拋磚引玉」變咗「碎玉」,做唔做都係未知之數。

政府其實明明已經俾咗5.5億公帑做前期研究,研究範圍應理包晒1,700公頃,依家減完700公頃又疑似再縮水,最開心好可能係負責做研究嘅顧問公司,竟然有咁便宜嘅生意。

根據政府明日大嶼計劃,明明大交椅州的填海選址只留下一條狹窄海渠,搖身一變由小渠變海道,唔知係存心視覺欺騙定如實反映海平面上升水浸嘅實況。但值得留意嘅係,呢張政府最新構想圖,同御用智庫團結香港基金當年2,100公頃嘅「強化東大嶼都會」餅印咁似,令人好懷疑係連2030+嘅官方文件都只係抄功課而黎。

明日大嶼第二期700公頃話冇咗,如果構想圖都可以咁隨便冇咗一大忽,究竟未來連第一期會唔會都出現大縮水或消失埋,都係一個好大疑問。

註:《香港2030+》: 最終建議 – 報告書

本文獲授權轉載,原文可見於作者Facebook

相關文章:

責任編輯:Alex
核稿編輯:Alvin


Tags: