夥前《蘋果》記者開班教查冊監察社區，前區議員：失去空間前「留返條尾」

採訪、攝影：盧珮瑤

西貢普通道路旁的簷篷下，藏著一間新式的「士多」 ，外面飄揚著寫上年青偶像姜濤《蒙著嘴說愛你》一句「即使要蒙著我嘴，我亦可高呼」歌詞的黑白旗幟。推開隔蚊屏障，總能見到陳嘉琳（Debby）在店裡打點一切。她是西貢區前區議員，現時化身「西多」店長。

是次訪問約好在「西多」進行，惟期間多次被打斷，不為甚麼，只因新知舊雨都希望來探望Debby。有人來「打牙骹」、有外籍街坊詢問她區內的事務，「好多人都唔知其實我（已經）唔係區議員嚟㗎喇！」

議辦與「西多」

所有街坊每逢來到「西多」，都總會問：「使唔使除鞋呀？」「因為呢個位係我以前議辦，係要除鞋先入得，大家慣咗。」

昔日議辦隨區議員身分消逝，Debby形容現時「西多」成為士多聚腳點。「西多」約200呎舖位，以「前舖、後辦公室」方式呈現，店中擺放了不少街坊的手作產品、香港人系列的文具，亦有「手足獄中讀物」出售，由在囚或已出獄者捐出，讓街坊與同路人以文字同呼同吸。

今年5月，立法會通過《2021年公職（參選及任職）（雜項修訂）條例》，要求區議員宣誓，不遵從者將會被取消議員資格，港府更「放風」指宣誓不通過被「DQ」者或會被追討全數薪津，導致逾200人辭職，陳嘉琳是其中一員。

「辭職之後，見到呢度有個咁嘅空間，就同業主傾不如轉型做舖頭」，業主首肯，「西多」從此誕生。Debby曾在辭去區議員身分後重返職場，一星期有兩天到「西多」看舖，「當時舖頭開咗一個月，有好多operation（運作）嘅嘢，又未balance（平衡）到條數」。在工作與小社區，她毫不猶豫選擇後者，「𠵱家都係攞錢嚟貼，可能僅僅夠交租」。

既為街坊聚腳地，「西多」舉辦多種免費活動，如萬聖節試酒會、「廚餘trick or treat」等，鼓勵居民回收廚餘。為支撐士多營運，Debby指現時除了售賣街坊手作和特色貨品，亦會主打舉辦工作坊，其中一個最為突出的，是教導街坊以調查報導形式，了解社區的環境問題。

規劃．社區．公民記者

工作坊當晚，幾個街坊擠到「西多」裡、帶備筆記簿上課，更有新聞系學生遠道走入西貢參加。Debby見狀，隨即與當晚講者、前《蘋果日報》記者阿K（化名）打趣笑說「好似上lecture（講堂）咁！」。的確，工作坊內容的資訊量可媲美大學講堂，由鄉郊、新界常討論的問題，說到各種查冊用具的用法，由查看地段號碼，說到查閱公司由誰人持有，找出端倪。

在工作坊的翌日，政府再收緊查冊，規定由本（11）月起須實名查冊，向處方申報姓名及電話號碼，個人資料在《私隱條例》許可下，可披露或轉交予執法機關。

「其實唔知幾時連查冊都唔做得，我想喺無晒空間之前留返條尾」，Debby笑言，自己都有感工作坊主題太「hardcore」（困難）。但，回想自己當天由規劃門外漢，一步步走到區議員位置，「我會覺得自己學到，街坊都一定學到」。也許小市民正需要更高的本領，才擋得住世態。

「公民記者『聞到有事發生』嘅本領係比較強，media（媒體）有時監察未必下下會落到社區，特別無咗《蘋果》之後，成個世界好似靜咗咁，多一兩個識就係多一兩個」。

阿K曾於《壹週刊》、《蘋果日報》處理多篇規劃相關報導，「以前有前輩教落，查冊工具係記者寶貴資產，唔可以隨便咁教人」。不過，今天他選擇在工作坊把知識落地，「上年之後記者越嚟越難做，媒體力量做唔到幾多，但個地方一樣會照有問題、照樣會有『垃圾山』，而居民正正係stakeholder（持份者）之一」。

成為「前人」之前

在成為「被失業」的人之前，這位「前區議員」及「前記者」，在各自崗位上，同樣以監察土地規劃問題貢獻社區。

Debby大學畢業後，投身非牟利環保團體，首次接觸規劃工作。隨後為立法會前議員、主打土地規劃問題的朱凱廸擔任議員助理，直至前年區選，Debby以2,127票當選，「擔大旗」成為西貢區議員。兩年任期中，她尤以一次地區問題研討會，感受到何謂居民力量，「以前做NGO慣咗要跟agenda（議程），嗰次係由居民帶個討論，先發現原來可以有唔同方法傾嘢」。

居民為家園奮戰同時，外面亦有媒體作保護罩，阿K是其中之一。入行6年，曾任職《壹週刊》調查組及《蘋果日報》專題組記者，期間負責不少與土地規劃相關報導。最令他感受至深，卻不是哪一篇獨家報導，反而是採訪的一個片刻，「嗰陣做橫州follow（追故），發現有大集團會喺啲地搵啲有背景人士看住，每逢有陌生嘅車駛入去，啲居民都會好驚，可以感受到佢哋嘅驚弓之鳥」。

去年年底，海洋公園推出收費行山項目，並用鐵閘封鎖登山纜車救援徑，及後被踢爆救援徑部份路段屬政府土地，報導者正正是阿K，「最終我見到好多人上返去行山，其實條路一啲都唔好行，但唔知點解又覺得幾開心」。

成為「前人」之後⋯⋯

不過，多少篇重要報導，都在今年6月被一洗而空，消失於歷史洪流。阿K坦言，《蘋果日報》倒閉後，只能渾噩地沉澱事實，亦有打算放棄從事媒體的念頭，「仲可以自由批判社會嘅傳媒都唔會捱得好耐，邊個會做下一個《蘋果》？」面對崩壞，他決定將遠赴外地一段時間，整頓思緒，「如果《蘋果》唔執，我都仲會留喺香港，所以我會想趁走之前，留低一啲嘢畀居民」。

留守社區的Debby，希望繼續以「西多」「keep（集合）住班人」，「前面係點都唔知，都係用有限空間做嘢」。她指，未來西貢仍有多項規劃值得關注，包括西貢公路改善工程第二期，工程將會「殺入」市中心，意味或會有收地的情況，「無咗區議員身分，但儲落咗一班街坊，做區議員more than（多於）一份工，無得『係咁先啦』」。