嶼箭在弦:明日大嶼會唔會連環評都過唔到?

嶼箭在弦:明日大嶼會唔會連環評都過唔到?
Photo Credit: Reuters / 達志影像

我們想讓你知道的是

價值$2.2億嘅研究,環諮會連基本功課都無做好就出嚟匯報,大家真係要拭目以待睇下,今個月會交份咩質素嘅「環評研究概要」出嚟。

喺政府大推北部都會區嘅同時,明日大嶼嘅工作依舊馬不停蹄進行中。昨日(8)環境諮詢委員會就明日大嶼(中部水域人工島)工程研究開會,本研都有特派研究員到場化身旁聽師。喺會中,顧問公司表示今個月(11月)內就會提交人工島嘅「環境影響評估研究概要」 (EIA Study Brief) ,正式打響明日大嶼工程嘅第一波攻勢。

255420918_4631714456924591_1281722312858
圖片由作者提供

雖然文件有提到成本問題,環諮會主席黃遠輝一開席就叫公眾唔好理大家最關注嘅財政問題,叫委員集中討論明日大嶼嘅環境方面。但咁多個委員一睇文件,除咗發現人工島成個環境研究策劃上有先後次序嘅問題外,作為人工島研究重要參考嘅「香港2030+ 策略性環境評估可行性研究報告」同「香港2030+ 可持續發展評估」更不翼而飛。

委員想政府進一步解釋嘅時候,署方就「博大霧」話負責同事今日無出席,俾唔到具體回應,後來更承認「個島個具體形狀,範圍,大小原來未定好」。價值$2.2億嘅研究,連基本功課都無做好就出嚟匯報,大家真係要拭目以待睇下,今個月會交份咩質素嘅「環評研究概要」出嚟?入面又會唔會出現咩「得意諗法」?

面對環諮會就人工島具體環境問題嘅批評,今日黃遠輝就話面積「可加可減」。呼應早前林鄭將明日大嶼「縮水」,喺政府新常態下,人工島「願景」嘅可變性已經相當大,照咁聽,人工島都唔知會唔會過唔到日後環評審批。所以,公眾除咗幫手睇實呢份即將公佈「環評研究概要」,喺未來嘅公眾諮詢期,更唔可以放過入信表述嘅機會,一齊「質爆」人工島從環境上嘅存在理據。

想了解更多人工島嘅環境災難問題,公眾同時可以密切留意,嚟緊本研聯同綠色和平,率先深入調查世界各地嘅人工島項目,從當地環境及生態角度,發現唔少都係由雄心壯志嘅發展項目,最終淪落成為「爛島仔」!其實只要做足功課,就會知道前車可鑑,「明日大嶼」將會帶嚟咩災難性環境後果。

本文獲授權轉載,原文可見於作者Facebook

相關文章:

責任編輯:Alex
核稿編輯:Alvin


Tags: