點解環評連個人工島都唔見左?

點解環評連個人工島都唔見左?
Photo Credit: Reuters / 達志影像

我們想讓你知道的是

原來連個人工島確實個邊界都未準備好,島上嘅用途完全未有概念,就照交上去話要環諮會做環評,程序上完全亂到一個點。

政府11日揀咗幾間環團當做諮詢,今日就立即向環諮會交咗個環評項目簡介(Project Profile),話要開展幫明日大嶼人工島做環評。只係過咗一日就當諮詢完立即上會,可見今時今日公眾意見真係賤過地底泥。

民意梗係要被「精簡程序」,但係依家政府交個份環評張圖,原來連個人工島確實個邊界都未準備好,島上嘅用途完全未有概念,就照交上去話要環諮會做環評,程序上完全亂到一個點。

你交出黎個島上面嘅具體用途乜都冇,做動物實驗室定核電廠都唔知(只係透露可能會有個焚化爐),連個島個形狀同邊界又冇,你突然變番2000公頃同縮到成為一個「睇你唔島」更加唔知,你教我究竟要評估一個「估你唔島」乜野環境影響?

254980722_4640496749379695_7588191724696
圖片由作者提供

負責準備嘅公司ARUP(奧雅納工程顧問)收咗前期人工島研究撥款2.2億,其實早前已經收過一次團結香港基金錢做人工島代言,個董事聲稱「數據顯示」個島嘅浪唔會高過2米,被天文台前台長林超英即時駁斥有記錄過5米,今日連政府都承認咗唔係事實。依家交份咁「估你唔島」嘅環評文件,又再一次打破咗啲所謂專業顧問團體嘅底線。

雖然我哋完全唔收財團政府錢做研究,但都要講句公道說話,你收得人2.2億咁多錢做研究,就要有番做研究基本嘅倫理,門面都唔該交番2.2億嘅貨仔出黎,依家連個人工島有幾大都冇就照交功課,當然可以當公帑係必賺生意或者當交功課,但係代價就係做衰做爛自己個朵,雖然佢哋可能唔太介意。

我哋會繼續跟進環評研究成個過程,好戲將會陸續有黎,關注明日大嶼人工島嘅朋友都係時間開工喇!

參考資訊:

坪洲填海關注組對「人工島開展法定環評程序」之回應:

慳啲啦【明日大嶼環評研究斬件上馬 睇完工程簡介圖嚇一跳】:

本文獲授權轉載,原文可見於作者Facebook

責任編輯:Alex
核稿編輯:Alvin


猜你喜歡

Tags: