未夠半年,北部都會區已出師不利?

未夠半年,北部都會區已出師不利?
Photo Credit: Reuters / 達志影像

我們想讓你知道的是

同樣屬融合計劃一環嘅高鐵、港珠澳大橋為例,疫情底下可謂蝕到入肉,而且現階段看亦暫未有通關的跡象,可見邊境嘅客觀存在,的確會影響一個跨境規劃嘅成敗。

去年底政府公佈北部都會區嘅未來藍圖,除咗立即已引發炒賣潮[1],到2022年已有各種規劃問題迅速浮現,未興建已亂象叢生。

南生圍發展將挑戰濕地保育區概念

早幾日恒地同傅老榕家族嘅南生圍發展項目就上訴得直[2],好有可能跟政府收700公頃濕地做保育公園有衝突。發展商自己仲話讓政府提前落實「北部都會區」計劃,取回154.4公頃濕地及數十億元的補地價款項。喺政府仲未公佈濕地保育公園嘅具體安排同時間表之前,發展商睇嚟已經「幫」政府諗埋,成個濕地保育願景俾人帶住走。

如果政府真心想搞好濕地,根本可以先發制人以公眾利益為由提早收地做全面保育管理,避免私人發展利益窒礙整體保育質素,事實上私人發展商提出南生圍發展項目,將濕地割到零零碎碎然後係隔離做低密度豪宅,保育成效根本成疑。講到尾,而家政府只係打「開口牌」收地,仲未有具體方案,加埋而家發展商爭取多年嘅「雙生共融」好可能過關。到時相信政府更有動機,以公私合營嘅名目「收啲唔收啲」濕地,700公頃收唔收得足,政府就會話「唔想糾纏數字」,隨時成為北部都會區第一單「走數」嘅項目。

271643850_4848574991905202_4108681934608
圖片由作者提供

北部將成「廢氣都會區」?

有環團研究發現,上年有五大空氣污染「重災區」,當中有唔少區位於北部都會區,除咗源自對岸工業而產生嘅污染物,亦涉及本地同跨境汽車排放[3]。政府以概念先行方式空降劃出個北部都會區,背後好可能根本忽視咗新界北部空氣質素惡劣嘅實況,既然個基線數據已經咁「烏煙瘴氣」,額外整個大都會出來,當環評過唔到關時,到時就唔好賴城規程序卡住。

概念牽起濕地倒泥狂熱

上年10月施政報告話要搞濕地保育公園,到11月被揭發蠔殼圍持續有不知名泥頭車倒泥。據報蠔殼圍區內至少有5個地點差唔多有20公頃已被傾倒泥頭,或者平整土地,自推出北部都會區後,濕地被破壞嘅情況反而變本加厲,報導最新仲見到搞埋「收費營地」,大搞打卡熱點[4]。政府搶閘公佈濕地保育公園概念,但又唔積極監管倒泥頭嘅情況,更顯呢啲概念先行嘅計劃「得個講」,規劃根本未成熟。到時濕地漁塘嘅生態價值盡失,政府收地都慳番,唔洗搞濕地保育公園。

北部通關泡湯 深港融不了

政府眼中,北部都會區屬深港融合計劃,「人才」於邊界間流動為必要條件,而都會區發展能否「回本」,唔能夠忽視邊境管制的客觀存在同需要,而邊境管制的措施會因眾多影響因素,而「人才」嘅流動意願亦受兩地未來數十年嘅政策影響。以同樣屬融合計劃一環嘅高鐵、港珠澳大橋為例,疫情底下可謂蝕到入肉,而且現階段看亦暫未有通關的跡象,可見邊境嘅客觀存在,的確會影響一個跨境規劃嘅成敗,對於一個數萬億投資嘅北部都會區更加係。

注釋:

  1. 北部都會區 炒地遊戲正式開始(19-11-2021,本土研究社)
  2. 南生圍發展項目上訴得直 北都添變數 城規:研判辭 測量師:政府可土地改劃前收回(7-1-2021,明報)
  3. 屯門空污8連冠 元朗北區東涌大埔緊隨 居北部都會區 未來恐吸廢氣度日(10-1-2021,東方日報)
  4. 北都公布後保育區20頃地遭倒泥 5地點受破壞 設收費營地 規劃署:正調查(9-1-2021,明報)

本文獲授權轉載,原文可見於作者Facebook

責任編輯:Alex
核稿編輯:Alvin

【加入關鍵評論網會員】每天精彩好文直送你的信箱,每週獨享編輯精選、時事精選、藝文週報等特製電子報。還可留言與作者、記者、編輯討論文章內容。立刻點擊免費加入會員!


猜你喜歡

Tags: