「他犯了很多錯，但他證明自己配得上烏克蘭」——澤連斯基，從喜劇演員到國家支柱

（編按：原文發表於2022年2月27日）

星期日唔講無聊嘢，講吓烏克蘭總統澤連斯基（Volodymyr Zelensky）。

呢個星期澤連斯基係全球焦點人物，亦係俄軍要對付嘅頭號人物。佢堅持留守首都基輔，亦拒絕美國提出嘅逃亡建議。好多人佩服佢嘅勇氣，同時亦對佢十分陌生，我只係知道佢係一個喜劇演員出身，好奇佢係一個點樣嘅人，上網搵咗以下資料。

澤連斯基讀法律出身，後來成為一個喜劇演員，2015年憑劇集《人民公僕》喺國內聲名大噪，劇中佢飾演一位中學歷史老師，意外成為國家總統，一個素人「逆轉勝」登上高位，嘗試解決國家積壓已久問題，劇情吸引好多對現況不滿嘅烏克蘭人收睇，第一季收視率有10.4%。

Youtube免費有得睇《人民公僕》，有英文字幕，第一集觀看人次已經爆升至逾1400萬次，有興趣朋友可以去睇澤連斯基作為演員一面。《人民公僕》其後推出第二季、第三季，澤連斯基喺國內獲得極高人氣，佢喺2018年組成人民公僕黨，2019年5月喺總統選舉獲勝，當年41歲。

澤連斯基當選總統後，好快見識到國際政治現實、黑暗一面，2019年7月18日美國扣起4億美元對烏克蘭軍事援助，一星期後時任總統特朗普打畀澤連斯基施壓，要求烏克蘭宣佈針對拜登及佢個仔亨特嘅貪腐調查，當時美國民主黨正進行緊總統初選，拜登係候選人之一。

事件喺9月9日被揭發，引起輿論嘩然，兩日後美國終於批准發放對烏克蘭嘅軍事援助。而特朗普亦因醜聞「一身蟻」，最後被國會彈劾。

Photo Credit: Reuters/ 達志影像

澤連斯基一上任就見識到弱國無外交，特朗普利用佢去攻擊政敵。素人做咗總統，要順利施政亦唔容易。今年2月23號《紐約時報》刊登《基輔獨立報》主編Olga Rudenko評論文章，佢批評澤連斯基打擊腐敗無任何進展。根據「透明國際」數據，烏克蘭仍是歐洲第三腐敗國家，僅次於俄羅斯和亞塞拜然。

Olga Rudenko批評毫不客氣，節錄其中一段：

「當澤連斯基幕僚長的兄弟被發現提供政府職位以換取金錢時，澤連斯基什麼也沒做。最近，一名醉酒的高級議員在一場可能是由他造成的車禍現場向警察行賄，被攝像頭拍了下來。公眾被激怒了，但澤連斯基只是含含糊糊地說了一句表示不贊成的話，然後就當沒事了。就連總統新建的漂亮道路也陷入了爭議。人們認為，採購過程存在暗箱操作，價格過高。」

Photo Credit: AP / 達志影像

澤連斯基當選後支持度下滑，基輔國際社會學研究所 （KIIS）今年1月民調顯示，62.5%的受訪者不支持澤連斯基連任，30.3%的人支持。同月KIIS另一個民調顯示，53.1%受訪者認為，如果俄羅斯入侵烏克蘭，澤連斯基將無法作為最高統帥有效工作，只有31.9%受訪者認為總統能夠有效工作。由此可見，民眾、傳媒都對澤連斯基寄望不大。

直至戰事爆發，澤連斯基堅持留守基輔對抗俄軍，表現令人刮目相看。曾經批評佢施政嘅《基輔獨立報》主編Olga Rudenko，喺Twitter講「President Volodymyr Zelensky has made many really bad mistakes, and I’m sure will make many more, but today he’s showing himself worthy of the nation he’s leading.」（澤連斯基總統犯了許多非常嚴重的錯誤，我相信他還會犯更多錯誤，但今天他證明了自己配得上他所領導的國家。）

Photo Credit: Reuters / 達志影像

烏克蘭嘅堅韌超出好多觀察家預期，但肯落注支持國家仍然唔多。烏克蘭駐德國大使Andrij Melnyk早前接受德國電視台訪問時，毫不忌諱講自己向德國高層求助遭到冷待，德方高層話「You Ukrainians have only a few hours left. There is no point in helping you now.」（你哋烏克蘭人剩返幾個鐘時間，我哋援助你已經無意思。）

有關報道係2月25日出街，但事實證明烏克蘭唔止撐到幾個鐘，喺俄軍攻勢下，呢一刻基輔仲未淪陷，歐洲部份國家亦都開始提供軍事物資援助。

但基輔仲可以支撐幾耐？澤連斯基早前同歐盟領導人講「This might be the last time you see me alive」（這可能是你最後一次看到我活著）。

烏克蘭總統澤倫斯基｜Photo Credit: Reuters / 達志影像

無人知呢位總統最後命運係點，但佢嘅表現已經贏得好多人尊重。有網民喺《基輔獨立報》主編Olga Rudenko嘅Twitter post留言支持「I hope he will survive.」

後記：我唔熟國際政治、烏克蘭局勢，只係試吓上網搵資料，試吓寫啲嘢，盡量標返資料出處，如果有錯歡迎指正。我諗一個總統有好多面向，可能某啲地方做得差，亦有某啲位守得住。呢一刻澤連斯基表現嘅勇氣和承擔，我覺得係非常難得。

文章獲作者授權轉載，原文看作者Facebook

責任編輯：Alvin
核稿編輯：Alex