一炮過解決香港住屋問題

文／圖：梁啟智

「土地大辯論」辯咗咁耐，其實我都仲係唔知有乜好辯。成件事有頭到尾都係搵嚟搞，根本個答案簡單到不得了：攞兩塊軍營地出來就收得工。

香港人口唔會無止境增加，去到822萬人或297萬戶就會見頂，因為新移民其實減少緊，戰後嬰兒潮再過多十幾廿年又屆預期壽命，到時人口係會減少而唔係增加。要滿足去到香港住屋需求最高峰時的土地需求，扣除已經將會開發的土地（如啟德和安達臣），政府自己話只係差220公頃。嗱，香港的軍事用地有成二千幾公頃，只係要攞石崗同昂船洲出來，其他添馬艦、九龍塘、尖沙咀唔要豪返俾佢，都已經夠用有突。呢條數唔洗填海，唔洗搞郊野公園，連哥爾夫球場都唔洗用，真係啊叻都應該支持。

政府最鐘意話軍營唔係閒置所以唔會選擇。喂，你問下新界耕緊田俾政府收地的農夫，政府有幾何會理塊地係咪閒置？再者，閒置唔閒置，事在人為，軍營可以搬去大灣區嘛，到時咪閒置囉。

市民關心的係住屋問題，政府就借機話要1,200公頃土地，點之呢條數除咗住宅仲包好多嘢，入面的分類又唔清唔楚，連石礦場都包埋，分明博大霧。唔該政府唔好轉移視線，講返住屋，兩個軍營已經可以一炮過解決香港住屋問題。呢個方案全香港七百萬人冇一個要犧牲，咁都做唔到就唔好同我話中央政府點樣照顧香港。

文章、圖片獲Kai Chi Leung 梁啟智facebook授權轉載

責任編輯：歐嘉俊
核稿編輯：周雪君